O Polvorín vence á Ximnástica de Torrelavega na Cheda (2-0)
O Polvorín vence á Ximnástica de Torrelavega na Cheda (2-0)
Os de Trashorras rencóntranse co triunfo seis xornadas despois
Os goles foron de dúas incorporacións invernais: Edu Taboada e Cristian
O Polvorín colleu aire na Cheda, onde se estreaba esta temporada como local, e fíxoo cun triunfo por dous a cero ante a Ximnástica de Torrelavega que lle permite achegarse aos postos de salvación na Segunda Federación.
Os de Trashorras resistiron os primeiros ataques do equipo cántabro e adiantáronse nunha acción de xogo directo, logo dun desprazamento longo de Julen. Edu Taboaba aproveitaba o servizo de Álex Ramos e abría o marcador.
A segunda metade comezou cun par de boas accións ao contraataque do Polvorín e cunha boa parada de Julen ao saque dunha falta. Despois chegou a expulsión de Chamorro nunha acción no centro do campo que protestaron moito os visitantes.
O Polvorín aproveitou a superioridade e acabou sentenciando o choque noutra contra, aos 88 minutos. A conducción espectacular foi de Iago Novo, e a definición de Cristian, outro xogador que acaba de chegar a Lugo.
No treito final tamén foi expulsado o técnico visitante Sergio Fernández. A vitoria deixa o Polvorín con 14 puntos.
