O PP non venderá a sede de Génova: "Os edificios non teñen a culpa de nada"

O coordinador xeral do PP, Elías Bendodo, deixou claro que a intención da dirección do partido é non vender a sede nacional na madrileña rúa de Génova xa que o edificio "é propiedade dos afiliados".

"A sede do PP é propiedade dos seus afiliados e os edificios non teñen a culpa de nada", asegurou Bendodo tras o comité de dirección do partido ao ser preguntado polo contrato que os populares asinaran cunha consultora para que lles buscase nova sede.

Neste sentido explicou que o contrato administrativo que a anterior dirección iniciou para proceder á venda "resolverase no seu momento", co que finalmente o PP non deixará a súa emblemática sede no centro de Madrid. "A intención é seguir aquí, neste edificio", resolveu Bendodo.

E é que o presidente do PP, Alberto Núñez Feijóo, xa avanzou en abril que a venda da sede nacional do partido non era a súa prioridade e que "se se fai unha operación, será por necesidade de financiamento ou tesourería, non por outra cuestión".

Desta forma queda sen efecto o anuncio que fixo o expresidente dos populares, Pablo Casado, o 17 de febreiro de 2021 cando dixo que o partido deixaría a súa histórica sede e cambiaría a súa localización para romper co pasado e a corrupción.

O anuncio fíxoo a semana que arrincaba na Audiencia Nacional o xuízo polo presunto pago das reformas da sede do PP con diñeiro negro. En outubro, a Audiencia Nacional condenou o extesoureiro Luis Bárcenas a dous anos de cárcere e o PP como responsable civil por pagar as obras de Génova coa caixa B.