Feijóo e os seus baróns esixen parar a "cota catalá" e reclaman 18.000 millóns para as autonomías

O líder do Partido Popular, Alberto Núñez Feijóo, reclama unha inxección inmediata de 18.000 millóns de euros para as comunidades autónomas sufragada cos fondos europeos Next Generation que non se executaron e un fondo transitorio mentres se negocia un novo modelo de financiamento.

O líder da oposición fixo esta esixencia nunha comparecencia sen preguntas ante os xornalistas, tras reunir os presidentes autonómicos do seu partido en Madrid para armar unha fronte común contra o financiamento singular de Cataluña e rexeitar a negociación bilateral da repartición dos recursos.

Feijóo esíxelle ao Goberno que retire a "cota separatista" de Cataluña e dixo que todos os presidentes autonómicos do PP renunciaron "expresamente a caer nunha bilateralidade tramposa", á vez que se comprometeron a "contribuír activamente" para establecer un novo modelo que "atenda ás particularidades de cada territorio". 

O líder do PP Alberto Núñez Feijóo e os seus baróns territoriais buscan, con este encontro, exhibir unha foto de unidade co financiamento autonómico e denunciar o intento de "división" que, ao seu xuízo, pretende o Goberno de Pedro Sánchez ao asegurar que o financiamento singular de Cataluña pode estenderse a outras comunidades autónomas.

Os populares recoñecen diferenzas. O partido deixa en mans de cada presidente a decisión de acudir ás reunións que Pedro Sánchez anunciaba para as próximas semanas concidindo co arranque do curso político.

Pero advirte que non caerán no que chaman bilateralidade tramposa: "Non imos caer na trampa de Sánchez e falar por partes do que é de todos", di Isabel Díaz Ayuso, presidenta da Comunidade de Madrid.

"Que convoque de xeito inmediato a Conferencia de Presidentes para falar con luz e taquígrafos dos problemas que afectan ao conxunto de cidadáns de España", reclama Juan Manuel Moreno Bonilla, presidente de Andalucía.

O PSOE: o único plan do PP sobre financiamento é "enfrontar Cataluña e España"

O PSOE acusou o PP e o seu líder, Alberto Núñez Feijóo, de non ter unha proposta "válida" e seria para reformar o sistema de financiamento autonómico e que o seu "único plan" é "enfrontar a Cataluña e España".

"Non lles vale con provocar o maior conflito territorial na historia recente de España -un conflito solucionado polos socialistas-, senón que cada día parecen empeñados en traelo de volta", profunda a formación.

Tamén censurou que Feijóo compareceu nunha "Moncloa de mentira" e que a súa posición continúa "cambaleándose" tras pedir a presidenta da Comunidad de Madrid, Isabel Díaz Ayuso, que os baróns populares non se reúnan co presidente, Pedro Sánchez."Isto, ademais de saírlle mal a Ayuso (...) demostra de novo que Feijóo non manda nin na súa casa e que a súa autoridade nin está nin se lle espera", espetou o PSOE.