O presidente de Gabón está baixo arresto domiciliario, segundo os militares golpistas

Os militares que hoxe tomaron o poder en Gabón aseguraron que o presidente do país, Ali Bongo, está baixo arresto domiciliario, despois de acusalo de "alta traizón" e "malversación masiva de fondos públicos", entre outros delitos.

"O Comité para a Transición e a Restauración das Institucións (CTRI) quere anunciar á comunidade nacional e internacional que Ali Bongo Ondimba está baixo arresto domiciliario coa súa familia e o seu médico", leu un dos militares nunha mensaxe emitida este mércores polas televisións do país.

A xunta militar tamén anunciou a detención dun dos fillos de Bongo, Noureddin Bongo Valentin, e do seu xefe de Gabinete, Ian Ghislain Ngoulou, entre outras persoas próximas ao mandatario gabonés.

Así, os uniformados acusaron os detidos de "alta traizón ás institucións do Estado, malversación masiva de fondos públicos, malversación financeira internacional por parte dunha banda organizada, falsificación e uso da falsificación da firma do presidente da República, e tráfico de estupefacientes".

Anteriormente, os golpistas anunciaron a disolución de todas as institucións de Gabón pouco despois de que a comisión electoral do país informase da vitoria de Bongo, no poder desde a morte do seu pai en 2009, nas controvertidas eleccións do pasado día 26.

Na mensaxe, o autodenominado CTRI asegurou que esas votacións non foron transparentes, cribles nin inclusivas, e acusaron o Goberno do país de gobernar "irresponsable e imprediciblemente", deteriorando desta maneira a "cohesión social".