Os militares anuncian que tomaron o poder en Gabón tras o triunfo electoral de Bongo
Os militares anuncian que tomaron o poder en Gabón tras o triunfo electoral de Bongo
A oposición denunciou "unha fraude orquestrada" por parte do Partido Democrático Gabonés do presidente Bongo nos comicios, que non tiveron observadores internacionais
As autoridades de Gabón cortaron a conexión a Internet e impuxeron o toque de recollida
O presidente de Gabón está baixo arresto domiciliario, segundo os militares golpistas
Un grupo de militares anunciou hoxe que o Exército tomou o poder en Gabón pouco despois de que a comisión electoral do país declarara o triunfo do presidente gabonés, Ali Bongo, nas eleccións do pasado sábado.
"O noso fermoso país, Gabón, sempre foi un remanso de paz. Hoxe, este país atravesa unha grave crise institucional, política, económica e social", afirmou un grupo duns doce militares nunha mensaxe difundida na canle de televisión Gabón 24.
"Ademais -subliñou o uniformado que leu a mensaxe-, hai que admitir que a organización dos prazos electorais, coñecidos como eleccións xerais do 26 de agosto de 2023, non reunía as condicións para unha votación transparente, crible e inclusiva, tan esperada polos gaboneses e gaboneses".
Tamén denunciaron que "a isto súmase unha gobernanza irresponsable e impredicible, que se traduce nunha continua deterioración da cohesión social, co risco de levar ao país ao caos".
"Hoxe, 30 de agosto de 2023, nós, as forzas de defensa e de seguridade, reunidos no Comité para a Transición e a Restauración das Institucións (CTRI), en nome do pobo gabonés e garante da protección das institucións, decidimos defender a paz poñendo fin ao réxime vixente", resolveron.
Salientaron, así mesmo, que "para ese efecto, anúlanse as eleccións xerais do 26 de agosto de 2023, así como os resultados truncados".
Centos celebran o anuncio de toma do poder dos militares
Centoa de persoas saíron esta mañá ás rúas de Libreville, a capital de Gabón, en apoio dos militares que aseguraron dar un golpe de estado contra o presidente gabonés, Ali Bongo, unha familia que está no poder desde 1967.
Despois da difundida na canle de televisión Gabón 24 a rede social X (antes Twitter) encheuse de vídeos de gaboneses celebrando o seu levantamento.
Algúns cidadáns tamén esnaquizaron os carteis da campaña electoral de Bongo, que aínda estaban nas rúas do país.
Ademais, as fronteiras do país "están pechadas ata novo aviso" e "disólvense todas as institucións da República, incluídos o Goberno, o Senado, a Asemblea Nacional e o Tribunal Constitucional.
Os golpistas fixeron finalmente un "chamado á calma e a serenidade ao pobo", e reafirmaron o seu "respecto dos compromisos de Gabón fronte á comunidade nacional e internacional".
A mensaxe emitiuse despois de que a Comisión Electoral Nacional Autónoma e Permanente (CENAP) informase de que Bongo, que leva no poder desde 2009, gañou as eleccións presidenciais do pasado día 26 co 64,27 % dos votos, a pesar das denuncias de fraude por parte da oposición.
![](https://img-g24-crtvg.flumotion.com/prog24/2023/20230830/20230830EleccionsGabon.png)
Bongo, que conseguiu un terceiro mandato de cinco anos, impúxose ao candidato da principal coalición opositora Alternancia 2023, Albert Ondo Ossa, que quedou en segundo lugar cun 33,77 % do escrutinio.
Ossa denunciara "unha fraude orquestrada" por parte do Partido Democrático Gabonés (PDG) do presidente Bongo nos comicios, que tiveron lugar sen a presenza de observadores internacionais.
As autoridades de Gabón cortaron a conexión a Internet e impuxeron un toque de queda tras a celebración este sábado das eleccións, que foron presidenciais, lexislativas e municipais.
![](https://img-g24-crtvg.flumotion.com/prog24/2023/20230830/20230830PresidenteGabon.png)
Protestas antes das eleccions
Máis de 846.800 gaboneses foron chamados este sábado ás urnas para votar nunha xornada que se caracterizou polos atrasos de ata varias horas na apertura dalgúns colexios electorais.
Nestes comicios a unha soa volta, Bongo aspiraba a un terceiro mandato de cinco anos, tras ocupar o poder en 2009 despois da morte do seu pai, Omar Bongo, quen gobernou o país desde 1967.
Esta votación tivo lugar baixo a sombra das últimas eleccións presidenciais de 2016 (entón os mandatos presidenciais eran de sete anos), cando Bongo venceu ao opositor Jean Ping por menos de 6.000 votos e a oposición denunciou fraude electoral.
As denuncias desataron unha crise postelectoral con protestas violentas duramente reprimidas, en que os manifestantes chegaron a incendiar a Asemblea Nacional.
Aquelas eleccións tamén foron cuestionadas a nivel internacional e a misión de observación da Unión Europea, que este ano non enviou observadores a Gabón, percibiu "anomalías" que cuestionaban o proceso e o seu resultado final.
O anunciou da toma de poder polos militares de Gabón ocorreu despois do golpe de estado cometido polo Exército en Níxer o pasado 26 de xullo.
Níxer converteuse así no cuarto país do oeste de África liderado por unha xunta militar, despois de Mali, Guinea-Conakri e Burkina Faso, onde tamén houbo golpes de estado entre 2020 e 2022.
Borrell: "O golpe en Gabón incrementa a inestabilidade en toda a rexión"
O alto representante da Unión Europea (UE) para Asuntos Exteriores, Josep Borrell, afirmou este mércores que o golpe de estado en Gabón "incrementa a inestabilidade en toda a rexión" central onde se sitúa o país africano, se as noticias sobre o sucedido se confirman.
"As noticias son confusas. Recibín as noticias esta mañá cedo. Sería outro golpe militar que incrementa a inestabilidade en toda a rexión", declarou o político español ao chegar á reunión de ministros de Defensa da UE que se celebra en Toledo.
Borrell constatou que a situación no África subsahariana "non está precisamente mellorando", ante as noticias sobre Gabón. Este novo golpe súmase ao que sufriu Níxer o pasado mes de xullo.