O presidente ucraíno chega a Hiroshima para participar no cume do G-7

O presidente ucraíno chegou este sábado a Hiroshima para participar na reunión de líderes do G-7 e doutros países convidados que se celebra na cidade nipoa.

Volodímir Zelenski viaxou nun avión do Goberno francés procedente de Ieda (Arabia Saudita). Está previsto que participe en varias xuntanzas do cume e celebre encontros bilaterais.

O líder ucraíno foi recibido cunha alfombra vermella por Seiji Kihara, secretario adxunto do gabinete do primeiro ministro nipón, Fumio Kishida, e unha ampla despregadura de persoal diplomático xaponés e de seguridade. 

"Xapón. G-7. Importantes reunións con socios e amigos de Ucraína. Seguridade e cooperación reforzada para a nosa vitoria. A paz estará máis preto hoxe", dixo Zelenski a través da súa conta de Twitter minutos despois da aterraxe da aeronave.

En concreto, agárdase que interveña en discusións con líderes do G-7 sobre apoio militar a Ucraína e sobre unhas eventuais negociacións para a paz.

Tamén podería reunirse co presidente dos EUA, Joe Biden, co primeiro ministro nipón ou co primeiro ministro indio, Narendra Modi, nas marxes do cume.