O PSG sanciona a Messi dúas semanas pola súa escapada a Arabia Saudita

O París Saint-Germain (PSG) sanciona a Leo Messi a dúas semanas sen emprego e soldo por viaxar o luns a Arabia Saudita sen permiso do club, un día despois da derrota ligueira do domingo ante o Lorient (1-3).

Aínda que o club non o comunicou oficialmente, varios medios franceses difundiron o castigo ao arxentino, quen alegara a súa viaxe a Riad (a uns 6.000 quilómetros de París) por un compromiso publicitario co país do golfo Pérsico, que é ademais un rival rexional de Qatar, principal accionista do PSG.

Así, durante dúas semanas, o campión do mundo pola Arxentina non poderá nin xogar nin adestrarse. Perderase polo menos os encontros ante o Troyes (7 de maio) e o Ajaccio (13). Cun salario mensual estimado nuns 3,37 millóns de euros, a sanción privaralle duns 1,70 millóns de euros.

Esta inaudita sanción coincide coa grave crise deportiva que atravesa o PSG, que caeu en picado desde que acabase o Mundial de Catar, precisamente o que entronizou a Messi. O equipo da capital resultou eliminado nos oitavos de final da liga de Campións ante o Bayern de Múnic e perdeu tres dos seus últimos catro encontros en casa, limitando a súa vantaxe no campionato local respecto ao segundo (Olympique de Marsella) a 5 puntos.

O capitán da selección arxentina, de 35 anos, termina ademais contrato cos parisienses o próximo xuño.