O PSOE ratifica a expulsión dos catro concelleiros de Santiago que levarán o caso" á xustiza"

O PSOE ratificou a expulsión dos catro concelleiros de Santiago expedientados o pasado mes de xaneiro, que xa anunciaron que levarán o caso á “xustiza ordinaria vía civil e mesmo penal”.

Nun comunicado, os catro concelleiros expulsados, Gonzalo Muíños, Mercedes Rosón, Mila Castro e Marta Álvarez, confirman que recibiron a resolución, pero indican que a recorrerán na Xustiza ordinaria ao entender que o proceso non seguiu nin tan sequera “uns criterios temporais de garantía”.

Poñen o foco en que a resolución non está asinada pola totalidade da Comisión Federal de Ética e Garantías do partido, “senón só dous dos seus membros, presidente e secretaria, alegando a urxencia da decisión”.

“Unha urxencia por resolver este expediente que non se aprecia noutros abertos na nosa provincia, en toda Galicia e no Estado, pendentes de resolución firme desde hai meses, ante mocións de censura da man do Partido Popular ou presuntos casos de corrupción e que está a provocar un enorme dano á reputación das nosas siglas”, denuncian.

Reprochan que o partido non utilice os mesmos criterios para toda a militancia, co que o PSOE pon de manifesto que “nin igualdade nin fraternidade”, sinalan.

Por tanto, os catro concelleiros recorrerán á xustiza ordinaria e subliñan que, para este paso, contan co apoio de centos de composteláns que lles mostraron o seu apoio mediante a firma dunha carta en que se critica a decisión do partido.

“Acudiremos á xustiza por dignidade, para defender a nosa integridade e, sobre todo, porque non estamos dispostas a permitir que de forma arbitraria alguén decida quen pode ou non ser socialista en función das súas preferencias persoais”, expoñen no comunicado conxunto.

"Somos socialistas"

Así mesmo, fan alusión velada novamente ao secretario xeral do partido na cidade, Aitor Bouza, que a pesar de que concorreu nas listas municipais das eleccións de 2027 non conseguiu acta de concelleiro, xa que figuraba como número 11, e os socialistas unicamente conseguiron seis representantes.

Respecto diso, insisten en que ningún deles está disposto “a baixar os brazos ante unhas presións constantes” que, desde antes mesmo de tomar posesión das actas de concelleiros pediron que as abandonasen “para facer oco” a Bouza.

Insisten en que os catro expulsados son “socialistas” porque manteñen esa militancia desde anos baixo a convicción de que pertencer ao PSOE “implica crer nun mundo máis xusto e defender unha sociedade baseada na igualdade”.

Por iso, tampouco entregarán as súas actas de concelleiros e anuncian que seguirán defendendo os valores do PSOE no “Concello de Santiago de Compostela ata 2027, cumprindo o compromiso alcanzado coas nosas veciñas e veciños que nos apoiaron nas últimas eleccións locais”.

“Porque ter palabra implica cumprir os compromisos, respectar as promesas que lle fixemos á cidadanía e actuar de acordo ás ideas e valores do partido ao que, con total honestidade, cremos estar en plenas condicións de poder seguir representando con dignidade”, afirman no texto.