O punto de PCR sen cita do hospital provincial de Pontevedra amplía horario
O punto de PCR sen cita do hospital provincial de Pontevedra amplía horario
O servizo incorpora un horario de mañá, de 10 a 14, e mantén o da tarde
Cada día fan unhas 500 PCR e detectan máis de 40 positivos asintomáticos
Non se pode acudir con síntomas ou cunha proba positiva de antíxenos
Unhas 500 persoas pasan cada día por este punto de PCR sen cita do Hospital Provincial de Pontevedra.
"A cola chegaba o xoves ao final do hospital". "Moita cola, a xente ten medo e quere estar segura", din algúns cidadáns desde a ringleira.
Reabriu na ponte de decembro e agora amplía o horario atendendo tamén polas mañás, de dez a dúas, a todos os que queren saír de dúbidas canto antes.
"Fun contacto de dúas persoas e por iso veño, para saír de dúbidas". "Quero que veña o meu netiño cear en Noiteboa". "Pola miña saúde e a dos meus maiores", explican os asistentes.
Dous postos de extracción e tres administrativos atenden este punto pensado exclusivamente para detectar positivos asintomáticos.
"Veñen moitos contactos de positivos que non dan recibido a chamada da central de seguimento, iso está ben, pero o que non pode vir é xente con síntomas ou que dese positivo nos antíxenos", di Maika Abal, coordinadora de cribados da área sanitaria.
O empeoramento da situación sanitaria na área, con máis de 2.400 casos activos e máis de 220 contaxios en 24 horas, fan que medren as colas para facer esta proba gratuíta, agora tamén en horario de mañá.
