As persoas de 70 a 79 anos tamén poñerán vacinas contra a gripe de alta carga
O Consello da Xunta aprobou destinar 7,2 millóns á adquisición destas vacinas
Por primeira vez, a Administración galega vincula o prezo de adquisición á efectividade final desas vacinas, nunha acción "pioneira a nivel mundial", di Alfonso Rueda
O Consello da Xunta aprobou este luns destinar máis de 7,2 millóns de euros para adquirir vacinas antigripais de alta carga destinadas ás persoas de entre 70 e 79 anos, con vistas á próxima campaña de vacinación do próximo outono.
Ata este momento esa vacina recibíana as persoas de máis de 80 anos ou as de máis de 60 residentes nun centro de maiores.
Ademais, esa próxima campaña contará cunha novidade: Galicia vai ser a primeira rexión a nivel mundial en impulsar un sistema de adquisición de vacinas que teña en conta os resultados e a efectividade real nos pacientes, segundo asegurou o presidente da Xunta, Alfonso Rueda.
Deste xeito, explicou Rueda, será un "acordo de risco compartido" e o prezo final que se pague polas vacinas dependerá da súa efectividade, en función de parámetros como ingresos hospitalarios.
"Se cumpren os obxectivos o prezo serán os acordado, e se non se cumpren será máis barato, e loxicamente oxalá se cumpra. Pero compartimos o risco co adxudicatario, e vinculamos o prezo á súa eficacia", dixo.
Este sistema de compra de vacinas mediante acordo de risco compartido xa se utiliza con outros fármacos. "De feito Galicia está utilizando este sistema en determinadas terapias ou tratamentos oncolóxicos ou para tratar algunhas enfermidades raras, pero en vacinas é a primeira vez que se vai facer no mundo", asegurou Alfonso Rueda.
A Xunta tamén aprobou este luns unha estratexia contra o idadismo, que incluirá campañas e programas nos colexios para erradicar a discriminación das persoas maiores.
