O servizo de teleasistencia atenderá 3.000 novos usuarios este ano

O Servizo de Teleasistencia da Cruz Vermella atende actualmente uns sete mil usuarios. En moitos casos a prestación vai máis aló do clásico botón de alerta e as chamadas de control. Segundo o Coordinador autonómico da oenegué, Joaquín Varela, a maior parte das solicitudes que reciben desde hai un par de anos son de teleasistencia avanzada, que inclúe por exemplo servizos de localización para persoas que teñen deterioración cognitiva.

A Cruz Vermella fai esta cobertura con cargo ao Servizo de Teleasistencia da Xunta que este ano vai ampliar a súa dotación ata un millón catrocentos mil euros para incorporar novos usuarios. Contan pasar dos sete mil actuais aos dez mil, segundo precisou a Conselleira de Política Social e Xuventude, Fabiola García, no acto o que fixo entrega tamén de catro novos vehículos aos responsables da entidade.

Os novos vehículos incorporan xa o cambio de imaxe que se vai aplicar tanto nos coches coma nos uniformes dos operadores que prestan servizos  no domicilio para que resulten máis identificables para os beneficiarios.