O Supremo decide se aplica a amnistía aos condenados por desordes públicas
O Supremo decide se aplica a amnistía aos condenados por desordes públicas
Entre os casos que terá que atender o Alto Tribunal están os do expresidente da ANC Jordi Sánchez, o expresidente de Òmnium Jordi Cuixart, a expresidenta do Parlament Carme Forcadell e os exconselleiros Josep Rull e Joaquim Forn
Nestes casos, xa cumpriron as penas ou foron indultados, polo que o Supremo deberá decidir se lles aplican a amnistía e borran os seus antecendetes
![Joaquim Forn, Josep Rull, Dolors Bassa e Carme Forcadell durante o xuízo do 'procés' no Supremo](https://img-g24-crtvg.flumotion.com/prog24/2024/20240710/supremo-proces-forn-rull-bassa-forcadell-arquivo-100724.png)
Os maxistrados do Tribunal Supremo (TS) que xulgaron o procés reúnense este mércores para debater se cabe aplicar a lei de amnistía aos condenados nesta causa por desordes públicas; é dicir, ao expresidente da ANC Jordi Sánchez, ao expresidente de Òmnium Jordi Cuixart, á expresidenta do Parlament Carme Forcadell e aos exconselleiros Josep Rull e Joaquim Forn.
Ao teren todos as penas extinguidas, o tribunal estudará se procede ou non borrar os seus antecedentes penais.
Fontes xurídicas consultadas por Europa Press confirman que os maxistrados deliberarán despois de pronunciarse o pasado 1 de xullo sobre a aplicación da amnistía aos condenados por malversación e desobediencia: o exvicepresidente catalán Oriol Junqueras e os exconselleiros Dolors Bassa, Raül Romeva e Jordi Turull.
Nos seus casos, o tribunal rexeitou amnistiar a malversación, pero viu amnistiable a desobediencia. Con todo, ante as dúbidas que ten sobre a legalidade da lei de amnistía, deu dez días a defensas e acusacións para que se pronunciasen sobre se vían pertinente consultar ao Tribunal Constitucional pola redacción da norma sobre a desobediencia.
Así, queda pendente que o Supremo resolva sobre a aplicabilidade ou non da lei de amnistía ao resto de líderes independentistas, que permanecen condenados por desordes públicas, algúns con penas xa extintas. Este asunto abordarano na reunión deste mércores.
No caso de Sánchez e Cuixart, ambos foron condenados a nove anos de prisión e inhabilitación por un delito de sedición. En 2021, o Goberno perdoou as súas penas de cárcere e en 2023 o Supremo revisou os seus casos pola reforma penal que derrogou a sedición. Finalmente substituíulles ese delito polo de desordes públicas, o cal extinguiu as súas inhabilitacións.
Forcadell, Rull e Forn foron condenados a penas de ata once anos e medio de prisión e inhabilitación por sedición. Eles tamén se viron beneficiados por un indulto do Goberno e, tras a reforma do Código Penal, o Supremo cambioulles o delito de sedición polo de desordes públicas, polo que tamén se extinguiron as súas penas de inhabilitación.
Fontes xurídicas consultadas por Europa Press precisan que o mércores o tribunal tamén abordará os casos dos exconselleiros Santi Vila, Meritxell Borrás e Carles Mundó, que foron condenados por desobediencia a penas de multa e inhabilitación en 2019.
Os seus casos non cambiaron desde entón, dado que ao non teren penas de prisión non foron agraciados con indultos do Goberno e, tras a reforma penal que derrogou a sedición, tampouco se viron afectadas as súas condenas.
As mesmas fontes indican que o previsible é que o tribunal, do mesmo xeito que fixo ao analizar a aplicabilidade da amnistía á desobediencia do resto de condenados do procés, dea prazo a defensas e acusacións para que se pronuncien sobre se ven pertinente consultar ao Tribunal Constitucional.
Á marxe, o Supremo ten reservada en axenda tamén a deliberación sobre se aplica a amnistía en seis casos relativos a delitos de desobediencia e desordes públicas enmarcados no procés, incluídos o da exconselleira Meritxell Serret ou o dos membros da Mesa do Parlament Carme Forcadell ou de Roger Torrent.
As fontes consultadas precisan que se trata de procedementos que están en mans do Supremo porque chegaron vía recurso de casación e que agora, tras a entrada en vigor da lei que exonera unha década do procés, se estudará se é pertinente ou non amnistialos nestes casos.
Os maxistrados revisarán se procede aplicar a amnistía ao caso da exconselleira de Acción Exterior da Generalitat Meritxell Serret, condenada por desobediencia ao participar na organización e celebración do referendo ilegal do 1 de outubro de 2017 mentres estaba na Consellería de Agricultura. O Tribunal Superior de Xustiza de Cataluña impúxolle un ano de inhabilitación e multa de 12.000 euros.
O tribunal, á súa vez, revisará se amnistía os catro membros que integraban a Mesa do Parlament en 2017 baixo a presidencia de Carme Forcadell: Anna Simó, Lluis Corominas, Lluis Guinó, e Ramona Buffet. Todos eles foron condenados por un delito de desobediencia a multa de 1.200 euros e catro meses de inhabilitación.
Ademais, abordará o caso doutros catro membros da Mesa do Parlament: Roger Torrent, Josep Costa, Eusebi Campdepadrós e Adriana Delgado. Os catro foron absoltos do delito de desobediencia que lles atribuía a Fiscalía por admitir a trámite propostas de resolución a favor da independencia de Cataluña.
Deliberará tamén sobre o caso do exalcalde de Sabadell Matíes Secarrant (de Crida per Sabadell), condenado en primeira instancia a pena de multa por un delito de desobediencia grave ao non impedir o referendo ilegal do 1-O.
E analizará o caso dun mozo que participou nas manifestacións contra a sentenza do procés en outubro de 2019. A Audiencia Provincial de Barcelona condenouno a catro anos e un mes de prisión, pero o Tribunal Superior de Xustiza de Cataluña rebaixou a pena a un ano e seis meses ao revogar o delito de atentado contra a autoridade e deixar só o de desordes públicas agravadas.
Por último, estudará se aplica a amnistía a outros dous manifestantes que foron condenados por desordes públicas agravadas.