O Tribunal Supremo de Venezuela confirma a vitoria de Nicolás Maduro
O Tribunal Supremo de Venezuela confirma a vitoria de Nicolás Maduro
O resultado electoral foi sinalado de fraudulento dentro e fóra do país
O abandeirado da maior coalición opositora advertiu de que a decisión xudicial "só agravará a crise"
![](https://img-g24-crtvg.flumotion.com/prog24/2024/20240804/Maduro.jpg)
O Tribunal Supremo de Xustiza de Venezuela confirmou este xoves os resultados oficiais das eleccións do 28 de xullo, que deron a vitoria a Nicolás Maduro.
O Alto Tribunal venezolano está controlado por maxistrados afíns ao chavismo.
O resultado electoral foi sinalado de fraudulento dentro e fóra do país.
"Valida esta Sala Electoral os resultados da elección presidencial do 28 emitidos polo Consello Nacional Electoral (CNE)", dixo ante altas autoridades do Estado e representantes diplomáticos a presidenta do tribunal, a chavista Caryslia Rodríguez.
A sentenza, coa que conclúe maneira "inequívoca e irrestrita" a revisión das eleccións, prodúcese 22 días despois de que o propio Maduro solicitase este proceso, a través dun recurso de amparo que nunca se coñeceu e polo que foron convocados os 10 excandidatos presidenciais.
Rodríguez explicou que baseou a súa decisión nun informe elaborado por expertos nacionais e internacionais "altamente cualificados e idóneos", dos que se descoñecen as identidades, así como detalles de todo o proceso de validación, que levou a cabo sen presenza de representantes da oposición maioritaria.
Antes de que o tribunal emitise o seu fallo, o abandeirado da maior coalición opositora, a Plataforma Unitaria Democrática, Edmundo González Urrutia, advertiu que a decisión xudicial "só agravará a crise" que vive o país.
"Señores do Tribunal Superior de Xustiza: Ningunha sentenza substituirá a soberanía popular. O país e o mundo coñecen a súa parcialidade e, polo tanto, a súa incapacidade de resolver o conflito; a súa decisión só agravará a crise", expresou González Urrutia a través de X, onde augurou que o alto tribunal favorecería ao Goberno.
A PUD mantén que o seu candidato gañou por ampla marxe as presidenciais e publicou "o 83,5% das actas electorais" para reforzar o seu reclamo, que foi apoiado por varios países e organizacións nacionais e internacionais.
Con todo, o CNE proclamou gañador a Maduro, sen publicar os resultados desagregados, un punto que estaba contemplado no cronograma da contenda, o que foi esixido por boa parte da comunidade internacional.
O Goberno de Maduro "pecha capítulo" sobre a denuncia de fraude electoral
Despois da resolución do Tribunal Supremo de Xustiza, o Goberno de Venezuela deu por pechada a denuncia de fraude que pesa sobre as eleccións do 28 de xullo.
O ministro de Relacións Exteriores, Yván Gil, asegurou á canle estatal VTV que a sentenza da Sala Electoral "pecha un capítulo", a pesar de que dentro e fóra do país se criticou a falta de imparcialidade do alto tribunal.
"Queda claro, queda ben descrito todo o proceso, como foi levado a cabo, o detalle do proceso electoral (...) e é moi importante que o mundo o saiba, que triunfou a Constitución, o Estado de dereito, as institucións", dixo o chanceler minutos despois de que a presidenta do tribunal, Caryslia Rodríguez, lese a decisión que valida o triunfo de Maduro.