O TSXG confirma a pena de catro anos de cárcere para un home por violar unha menor en Ourense
O TSXG confirma a pena de catro anos de cárcere para un home por violar unha menor en Ourense
Entende que “a declaración da vítima, a da súa amiga, a da súa nai e o informe dos peritos constitúen un arsenal probatorio de cuxa entidade non se pode dubidar"
Os maxistrados entenden que o seu diagnóstico de esquizofrenia paranoide non afectou o desenvolvemento dos feitos
![](https://img-g24-crtvg.flumotion.com/prog24/2023/20231114/tsxg.png)
A Sala do Civil e Penal do TSXG confirmou a sentenza da sección segunda da Audiencia Provincial de Ourense que condenou a catro anos de prisión un home por cometer un delito de violación sobre unha menor de idade.
O acusado non poderá aproximarse á vítima nin comunicarse con ela por un período de cinco anos, segundo a resolución facilitada este martes.
O tribunal desestimou, por tanto, o recurso de apelación interposto pola defensa do investigado, pois entende que “a declaración da vítima, a da súa amiga, a da súa nai e o informe dos peritos constitúen un arsenal probatorio de cuxa entidade non se pode dubidar".
Os maxistrados tamén indicaron, en base ao estudo do seu historial clínico e do informe médico forense, que o seu diagnóstico de esquizofrenia paranoide non afectou o desenvolvemento dos feitos, xa que no momento que tiveron lugar atopábase "estable, podendo comprender a ilicitude da súa conduta e sendo capaz de actuar conforme esta compresión".