O Vaticano difunde a primeira foto do papa desde a súa hospitalización

O Vaticano publicou este domingo a primeira imaxe do Papa Francisco desde que foi ingresado no hospital Gemelli de Roma o pasado 14 de febreiro por mor dunha bronquite que máis tarde derivou nunha pneumonía e unha infección polimicrobiana.

A fotografía, que foi publicada no perfil oficial de X da Santa Sé, mostra a Francisco celebrando unha misa na súa sala de oración o domingo pola mañá.

"Esta mañá o Papa Francisco celebrou a Santa Misa na capela do apartamento do décimo piso do Policlínico Gemelli", publicou o Vaticano.

O Pontífice segue estable e aínda require terapia médica hospitalaria e fisioterapia motora e respiratoria, segundo o último comunicado da Santa Sé o sábado.

Na foto, o papa aparece na cadeira de rodas fronte ao altar vestido de branco e cunha estola morada, a cor que utilizan durante as celebracións no período de coresma, con ocasión da misa desta mañá. Aínda que a foto está tomada de lado, non parece que Francisco teña as cánulas nasais co osíxeno.

Tamén hoxe, como nos pasados domingos, só se difundiu o texto do ángelus escrito polo papa Francisco.

O papa segue estable

Este domingo non houbo parte médico, pero fontes vaticanas informaron de que a situación do papa "segue sendo estable" e "continúa co tratamento, incluída a terapia respiratoria e motora".

Tampouco recibiu visitas e pasou o día entre a oración, o descanso e algo de traballo, engadiron.