O xuíz deixa en suspenso a causa contra Errejón por baixa da avogada da denunciante

O xuíz que investiga ao exportavoz parlamentario de Sumar Íñigo Errejón por un presunto delito de agresión sexual acordou deixar en suspenso a causa debido á baixa médica por avanzado estado de xestación da avogada da denunciante, a actriz Elisa Mouliaá. 

O que fai o maxistrado é atender a petición da letrada de Mouilaá e suspender os prazos e actos procesuais do procedemento, no que mañá martes estaba prevista a declaración tanto de Íñigo Errejón como investigado como da actriz, segundo informa o Tribunal Superior de Xustiza de Madrid.

A avogada de Mouliaá, a primeira muller en denunciar ante un xulgado a Errejón por un presunto delito de agresión sexual, solicitou o pasado mércores ao maxistrado Adolfo Carretero suspender as declaracións previstas e paralizar os prazos da causa debido a que ela está nun avanzado estado de xestación e de baixa laboral debido ao mesmo.

Ese mesmo día, segundo informaron a fontes xurídicas, o maxistrado ditou un auto no que desestimaba as súas peticións e fixaba a declaración da actriz para o 12 de novembro, o mesmo día no que xa estaba citado Errejón como investigado. Pero este luns o maxistrado ditou un auto no que acepta a petición da letrada.

A actriz Elisa Mouliaá denunciou ante a Unidade de Atención á Familia e Muller (UFAM) da Policía que Errejón a agrediu sexualmente en setembro de 2021.