Os accidentes laborais causaron 796 mortos en 2024, 75 máis que o ano anterior

Os accidentes laborais causaron 796 mortos en 2024, 75 máis que o ano anterior, unhas cifras que os sindicatos cualifican de inasumibles e ante as que urxen medidas.

Segundo a estatística actualizada polo Ministerio de Traballo, dos accidentes de traballo mortais do ano, 646 foron durante a xornada laboral. Os restantes 150 foron nos desprazamentos ao traballo, o que supón 10 máis que en todo 2023.

Por tipo de relación laboral, entre os asalariados houbo 83 mortes máis, ata as 730; mentres que entre os autónomos reducíronse en 8, con 66 accidentes mortais.

Xa dentro dos accidentes mortais en xornada de traballo, 608 foron homes, mentres que 38 mulleres perderon a vida traballando.

Por sectores, os servizos volveron acaparar o maior número de accidentes mortais, con 326, 44 máis ca un ano antes. Seguido da construción, con 135 accidentes mortais, 4 máis que un ano antes; e a industria, con 116, 20 mortes máis; mentres que na agricultura rexistráronse 69 accidentes mortais, 3 menos que en 2023.

O índice de incidencia dos accidentes mortais en xornada laboral sitúase no 3,17 fronte ao 2,92 dun ano antes. Por actividades, é o sector agrario o que tivo maior índice de incidencia, cun 9,73; seguido da construción, cun 9,61; mentres que foi do 4,84 en industria e de 2,06 nos servizos.

Os sindicatos ven erros na prevención

A principal causa de morte segue sendo infartos, derramos cerebrais e outras causas estritamente naturais. O maior incremento deuse en choque ou golpe contra un obxecto en movemento, con 46 mortes, o dobre que un ano antes.

"Apréciase que as causas de accidentes mortais que experimentan un incremento máis acusado son as relacionadas cos riscos de seguridade clásicos e fáciles de previr, como os golpes con obxectos, os afogamentos nun líquido ou os atrapamentos, esmagamentos e amputacións", sinalan desde CCOO.

UXT incidiu en que "urxe levar a cabo actuacións inmediatas que poñan fin a esta situación", porque as empresas "poden e deben previr accidentes laborais protexendo as persoas traballadoras".

"O forte incremento da sinistralidade mortal está a advertirnos de que os problemas estruturais da prevención en España seguen sen solucionarse", critica CCOO.

A patronal CEOE (Confederación Española de Organizacións Empresariais) lembrou que a ocupación creceu no último ano en 1,5 millóns de persoas, e sinalou tamén o posible impacto da dina nestas cifras.

"Desde as organizacións empresariais e desde as empresas, a prevención de riscos laborais é clave (...) o noso compromiso coa seguridade e saúde dos traballadores é absoluto", subliñou en declaracións aos medios a directora de Relacións Laborais de CEOE, Rosa Santos.

En total, en 2024 rexistráronse 628.300 accidentes laborais con baixa, un 0,5 % máis, e 552.902 sen baixa, un descenso do 3 %.