Arredor de medio millón de traballadores terán que tributar polo salario mínimo interprofesional

A suba do salario mínimo interprofesional deixa a paga que perciben uns 2 millóns e medio de traballadores en España en 1.184 euros brutos mensuais. Son uns 50 euros máis cada mes que estarán suxeitos á correspondente retención do IRPF.

"A fiscalidade ten que ser progresiva pero é imprescindible para que repercuta nos que cobran o SMI en forma de servizos públicos", explica a vicepresidenta do Goberno e ministra de Facenda, María Jesús Montero. 

Segundo os cálculos de Facenda, o 80 % dos traballadores que perciben o salario mínimo seguirán sen ter retencións. O 20 % restante verá reducida a suba en máis dun 40 %. É dicir os 700 euros anuais terán unha carga fiscal de 300 euros.

 "Vai afectar principalmente a persoas solteiras que non teñen fillo ou familiares dependentes ao seu cargo porque non teñen deducións", afirma María Bastida, profesora de Empresa da USC.

A tributación entrará en vigor na próxima nómina e terá carácter retroactivo desde o 1 de xaneiro para os traballadores que xa viñan percibindo o salario mínimo. O resto de asalariados dependen das negociacións colectivas en cada sector. Os empresarios apuntan á mellora da produtividade para recuperar poder adquisitivo.

"Tenos que achegarnos á media europea para poder chegar con máis facilidade a final de mes", asegura Josep Sánchez Llibre, presidente de Fomento do Traballo.

E din que os grandes datos da economía non están a mellorar a capacidade económica dos traballadores.