Os aspirantes a liderar o PSdeG poderán presentar precandidaturas a partir do luns

Os aspirantes para liderar o PSdeG terán desde este luns, día 13 de xaneiro, ata o vindeiro venres, día 17, para presentar as súas precandidaturas á Secretaría Xeral, no marco do proceso de renovación dos órganos que afronta a formación con motivo do seu XV Congreso.

O calendario aprobado polo Comité Nacional o 21 de decembro empeza a recollida de avais do 18 ao 27 de xaneiro para que os aspirantes reúnan os apoios necesarios para que as súas precandidaturas sexan oficiais, que serían proclamadas de forma definitiva.

Aqueles militantes que queiran competir pola Secretaría Xeral do PSdeG terán que reunir o dobre dos avais mínimos esixidos en procesos anteriores, ao pasar do 6 % da militancia ao 12 %. Se se ten en conta que o partido ten uns 10.000 militantes en Galicia, segundo os últimos datos facilitados pola organización a Europa Press, a cifra sitúase ao redor das 1.200 sinaturas.

E é que os estatutos aprobados no 41 Congreso Federal que celebrou o Partido Socialista a finais de novembro en Sevilla marcan que os precandidatos teñan que achegar un 12 % de avais da militancia nos procesos rexionais.

No caso que máis dun socialista reúna os apoios necesarios, do 30 de xaneiro ao 8 de febreiro abrirase unha campaña de información á militancia, que terminará coa celebración de primarias o domingo, día 9, con posibilidade dunha segunda volta, se fose necesario, o día 16.

Besteiro será candidato; Gonzalo Caballero non revela se dará un paso adiante

O actual xefe de filas do PSdeG xa confirmou a súa intención de optar a revalidar o cargo, para o que conta co respaldo da dirección federal.

A pesar dos resultados obtidos nas eleccións do mes de marzo, nas que o Partido Socialista de Galicia colleitou o seu peor resultado, ao lograr só nove deputados, cinco menos que nos comicios anteriores de 2020, a dirección estatal do PSOE deixou claro o seu apoio a Besteiro, ao que emprazou a liderar o proxecto en Galicia os próximos catro anos.

O político lucense tamén obtivo o respaldo dos cadros orgánicos e institucionais en Galicia, o que se traduciu na súa volta á Secretaría Xeral no mes de abril nun congreso extraordinario en que, tras ser o único candidato presentado ás primarias, remudou o ata daquela xefe de filas do PSdeG, Valentín González Formoso.

Ante esta situación, queda por ver se algún outro militante do PSdeG opta por presentarse ao proceso interno que finalizará coa renovación da dirección. Recentemente, o que fora secretario xeral do PSdeG entre 2017 e 2021, Gonzalo Caballero, saíu publicamente a chamar ao PSdeG a un "cambio de liderado e rumbo" para evitar a "irrelevancia". Con todo, polo momento, non desvelou se dará o paso adiante.

Gómez Besteiro participou este sábado en Ourense nunha nova xornada dos "Diálogos de raíz" onde defendeu un modelo de coidados proactivo que sitúe as persoas no centro e que a política social e a sanidade sexan sinónimo de dignidade, igualdade e futuro.

 

 "Unha aposta polo que consideramos que nos une a todos, esa sanidade pública forte que presta servzos,  que non esquecemos a modernización da sanidade, esas novas enfermdades que temos que combater, esa especial atención á saúde mental e sobre todo como somos copaces de prestar esa aposta pola universalidade da prestación sanitaria, o que nos une a todos".