Os Estados Unidos lanzan outro ataque contra os hutís no Iemen

Os Estados Unidos lanzaron este venres outro ataque militar contra os rebeldes hutís no Iemen, tras a acción militar a grande escala realizada este venres nunha misión conxunta co Reino Unido, confirmou o Comando Central dos Estados Unidos (CENTCOM).

Os ataques adicionais levados a cabo o venres á noite tiveron un alcance menor ca os lanzados o día anterior e estaban dirixidos a un radar utilizado polos rebeldes.

A acción militar foi despregada desde o destrutor naval estadounidense USS Carney (DDG 64) na madrugada do 13 de xaneiro, no que se utilizaron mísiles de ataque terrestre Tomahawk, explicou CENTCOM.

Segundo subliña, estas operacións están completamente separadas das medidas tomadas pola coalición militar conformada por máis de 20 nacións baixo o nome Operation Prosperity Guardian, lanzada a finais de decembro.

As dúas accións forman parte dunha forte escalada de operativos militares para deter os ataques contra buques comerciais no Mar Vermello, que se realizan, segundo a milicia rebelde, en apoio á poboación palestina, bombardeada por Israel en Gaza.

O lugartenente Douglas Sims, director de operacións conxuntas do Estado Maior estadounidense, detallou este venres nunha conferencia de prensa que se lanzaron ataques a 28 enclaves na acción do xoves, apoiada por 10 países.

"Isto estaba exclusivamente deseñado para ir contra as capacidades que están a impedir a liberdade internacional de navegación".

Rebaixar a tensión na rexión

Pola súa banda, o portavoz do Consello de Seguridade da Casa Branca, John Kirby, dixo que os EUA non buscan unha guerra no Iemen contra os hutís, apoiados por Irán. Engadiu que a intención do presidente, Joe Biden, é rebaixar a tensión na rexión.

Biden enviou este venres unha carta ao Congreso dos EUA para informar do ataque aéreo, tras recibir críticas por non avisar o poder lexislativo antes do bombardeo.

“Non dubidarei en ordenar medidas adicionais para protexer a nosa xente e o libre fluxo do comercio internacional segundo sexa necesario", advertiu o mandatario estadounidense nun comunicado.

A zona do estreito Bab el Mandeb, onde se concentran os ataques das milicias hutís, é esencial para o comercio internacional, xa que por alí pasa arredor do 15 % do transporte marítimo mundial. De feito, moitas navieiras xa están cambiando as súas rutas, navegando polo sur de África, co conseguinte atraso e encarecemento das mercadorías.