Os EUA afirman que a ratificación do Supremo da vitoria de Maduro non ten credibilidade

O Goberno estadounidense considerou este venres que a ratificación por parte do Tribunal Supremo de Xustiza (TSX) de Venezuela da vitoria de Nicolás Maduro nas eleccións presidenciais do pasado 28 de xullo non é crible.

"Esta resolución carece de toda credibilidade dada a abafadora evidencia de que González recibiu a maioría dos votos", dixo nun comunicado o Departamento de Estado en referencia ao candidato opositor venezolano, Edmundo González Urrutia.

A nota destacou que as actas "dispoñibles publicamente e verificadas de forma independente mostran que os votantes venezolanos elixiron a Edmundo González como o seu futuro líder".

"Hai que respectar a vontade do pobo venezolano. Agora é o momento de que as partes venezolanas comecen a falar sobre unha transición pacífica e respectuosa segundo a lei electoral venezolana e os desexos do pobo venezolano", sostivo o Departamento de Estado.

O TSX, controlado por maxistrados afíns ao chavismo, confirmou o xoves que os cuestionados resultados das eleccións de xullo lle deron a vitoria a Maduro.

O seu fallo, co que esa corte conclúe de maneira "inequívoca e irrestrita" a revisión das eleccións, prodúcese 22 días despois de que o propio Maduro solicitase este proceso, a través dun recurso de amparo que nunca se coñeceu e polo que foron convocados ao TSX os 10 excandidatos presidenciais.

O Executivo estadounidense subliñou este venres que "os continuos intentos de reclamar fraudulentamente a vitoria de Maduro só exacerbarán a crise actual", e pediu ademais a Maduro "liberar a quen foi detido por exercer o seu dereito á libre expresión".

"Os Estados Unidos e a comunidade internacional seguirán defendendo os votantes venezolanos, cuxa vontade e dereitos foron socavados de forma continua desde o 28 de xullo. Estamos dispostos a apoiar un proceso inclusivo liderado por Venezuela para restablecer as normas democráticas", concluíu o Departamento de Estado.