Os EUA defenden a declaración do G-20, malia as críticas de Kíiv

Os Estados Unidos defenden a declaración consensuada no cume do G-20 malia non incluír unha condena da guerra en Ucraína, o que xerou críticas por parte de Kíiv.

O número dous do Consello de Seguridade da Casa Branca, Jon Finer, defendeu o documento en declaracións á prensa a bordo do avión Air Force One, no que o presidente estadounidense, Joe Biden, se dirixe a Vietnam tras participar no cume de líderes do G-20 na India.

Finer considera que a declaración emitida o sábado "non ten precedentes" e envía unha mensaxe sobre a "necesidade imperativa" de que Rusia deixe de usar a forza en Ucraína e se absteña de violar a integridade territorial dese país, que empezou a invadir en febreiro de 2022.

Especificamente, o comunicado urxe a "todos os estados" a evitar "a ameaza ou o uso da forza para tomar territorios", pero non inclúe unha condena á guerra de Ucraína. O Ministerio de Exteriores dese país expresou a súa decepción e suxeriu correccións na redacción do documento.