Os ladróns cébanse coas máquinas expendedoras na comarca de Bergantiños

Os donos dos establecementos poñen mensaxes cargadas de carraxe dirixida aos amigos do alleo.
 

"Polo menos saco de riba a rabia que teño e a impotencia de non poder facer nada", laméntase Pilar Río, de Piruleta.

Farta, porque é o terceiro roubo na máquina de autoservizo que ten no exterior do local.

"Esta vez foi con máis estrago. Da outra vez, rompéranme o cristal e desta romperon a estrutura toda da máquina e a electrónica", engade.

Mesma sensación noutro local situado a poucos metros. Catro roubos nas máquinas en cinco meses, tres no negocio de Carballo e este último no de Ponteceso.

"Veñen coas patas de cabra, pinzan dun lado e do outro, rebentan a reixa e despois póñense coa máquina e dálles igual todo. Sen contar co efectivo que non subtraen, as avarías son moi cuantiosas. Por exemplo, un billeteiro anda arredor dos mil euros de custo, e unha porta, segundo como fagan o estrago, pode andar polos 2.000 euros. Temos que deixar de funcionar con elas porque así é imposible. É inviable", explica Emilio Cambre, de A Bordo.

Pouco botín para moito estrago. As perdas suman miles de euros e, á vista dos resultados, de pouco vale o investimento en reforzar a seguridade. 
 

"Puxemos reforzos pero a verdade é que estou moi desanimado co tema porque vemos que isto non para. Aquí mesmo a temos detrás da reixa e estabamos un pouco máis tranquilos pero dálles igual, reixa ca sen reixa", lamenta Cambre.

"Estaba só a máquina e púxenlle esta porta de aceiro inoxidable por diante a ver se tentamos que non nos rouben. Rompéronme o que foi a porta e o 'bombín' para acceder aos billeteiros e moedeiros que ten pola parte de atrás", coincide José Ramón Liste, de RíoMar.

Sospeitan que é un grupo organizado, pero, segundo algunha testemuña, actúan un por un, nalgunhas ocasións usando coches roubados para non deixar rastro. A Garda Civil ten en marcha unha investigación de momento, sen froitos.