Os ministros de Exteriores da UE celebran unha inédita reunión informal en Kíiv

Os ministros de Asuntos Exteriores da Unión Europea (UE) reúnense este luns en Kíiv nunha cita inédita, por ter lugar nun país non comunitario e en guerra, que non fora anunciada ata o momento mesmo do seu comezo por razóns de seguridade.

"Convoco hoxe os ministros de Exteriores da Unión Europea en Kíiv á primeira reunión dos 27 Estados membros celebrada nunca fóra da UE", escribiu na rede social X (antes Twitter) o alto representante para a política exterior da Unión Josep Borrell.

I am convening today the EU Foreign Ministers in Kyiv, for the first ever meeting of all 27 Member States outside the EU.

Ukraine’s future lies within the EU. pic.twitter.com/1mz5gpB1qx

— Josep Borrell Fontelles (@JosepBorrellF) October 2, 2023

Segundo explicou a EFE un embaixador europeo, a celebración deste evento en Kíiv é unha mostra de apoio a Ucraína e ao proceso de reformas que está a acometer para entrar na UE.

“O futuro de Ucraína está na UE”, agregou Borrell na rede social X. “Estamos aquí para expresar a nosa solidariedade e o noso apoio á xente de Ucraína”, escribiu o xefe da diplomacia europea nunha mensaxe publicada pouco despois.

Sobre o simbolismo da celebración en Kíiv da reunión informal pronunciouse tamén á súa entrada ao evento o ministro de Exteriores de Ucraína Dmitró Kuleba. “É un acto histórico porque por primeira vez o Consello de Asuntos Exteriores vai ter lugar fóra das actuais fronteiras da UE pero dentro das súas futuras fronteiras”, afirmou.

Para Kuleba, a decisión de reunir en Kíiv os ministros de Exteriores dos 27 é unha mensaxe clara do compromiso do bloque coa ampliación e o ingreso de Ucraína. 

Albares reafirma “o apoio europeo ao pobo ucraíno”

O ministro de Exteriores español, José Manuel Albares, reafirmou o apoio do conxunto da UE a Ucraína, con motivo desta viaxe a KÍiv.

“Reafirmamos o apoio europeo ao pobo ucraíno no seu defensa da paz, a liberdade, a súa soberanía e integridade territorial”, escribiu Albares á súa chegada á capital ucraína na súa conta da rede social X.

Ya en Kyiv, junto a mis colegas UE, para celebrar el #CAE en @eu2023es.

Reafirmamos el apoyo europeo al pueblo ucraniano en su defensa de la paz, la libertad, su soberanía e integridad territorial. Apoyaremos a Ucrania todo el tiempo que sea necesario.

🇪🇸🇪🇺🇺🇦 pic.twitter.com/J4Stzc4ASP

— José Manuel Albares (@jmalbares) October 2, 2023

“Apoiaremos a Ucraína todo o tempo que sexa necesario”, agregou o ministro do Goberno de España, que desempeña ata final de ano a presidencia rotatoria da Unión Europea.