Os mortos polas inundacións na cidade libia de Derna podería ascender a 20.000

A cifra de mortos na cidade libia de Derna, situada ao leste do país, por mor das devastadoras inundacións rexistradas o luns ao paso da tormenta Daniel podería aumentar ata os 20.000, segundo alertou o alcalde da localidade, Abdulmenam al Gaizi, no medio dos traballos de procura de miles de persoas desaparecidas tras ser arrastradas polas augas.

Al Gaizi explicou, en declaracións concedidas á cadea de televisión Al Arabiya, que estes cálculos derivan dos enormes danos rexistrados en varios barrios de Derna, que sufriu a práctica destrución do 25 por cento da cidade, antes de incidir en que a interrupción das comunicacións está a dificultar as tarefas de procura e rescate.

Mentres tanto, na cidade xa se realizan soterramentos en foxas comúns, evitando no posible que os cadáveres se acumulen nas rúas e entre os cascallos das edificacións destruídas.

Así mesmo, o alcalde de Derna explicaba que a presa da cidade, que rebentou pouco despois de que outra situada río arriba se derrubara pola presión da auga, levaba sen mantemento desde 2008 por mor da crise política no país africano.

Os traballos de busca e rescate continúan na cidade e outras localidades afectadas no leste de Libia, onde arredor de 34.000 persoas se viron desprazadas por mor das inundacións, incluídas 30.000 en Derna, segundo datos da Organización Internacional para as Migracións (OIM).

Pero eses traballos complícanse tamén pola situación de crise política que vive Libia. O país atópase dividido en dúas administracións. En decembro de 2021 debían celebrarse eleccións presidenciais, pero aprazáronse. Así, a Cámara de Representantes deu por finalizado o mandato do primeiro ministro de unidade, Abdul Hamid Dbeibé, e desde ese momento xa dúas persoas ocuparon o cargo.

Así, Libia non logra superar o conflito e a inestabilidade que sacode o país desde a captura e execución de Muamar Gadafi en 2011, e nestes momentos dous gobernos reparten o país, ata o punto de que os dous ofrecen cifras distintas de falecidos polo paso deste ciclón. 

Ata o momento, as autoridades asentadas no leste do país cifraron en polo menos 5.200 os falecidos, aínda que fontes do Goberno de unidade de Libia elevaron a 6.000 as vítimas mortais.  

Neste sentido, o ministro de Aviación Civil das autoridades orientais, Hichem Chiuat, manifestou o mércores que as augas na costa de Derna "traen constantemente decenas de corpos" de persoas arrastradas ao mar Mediterráneo pola súbita inundación.  

A tormenta Daniel azoutou o leste do país tras causar estragos a semana pasada en Grecia, Bulgaria ou Turquía, onde se confirmaron preto dunha trintena de falecidos.