Os Reis Magos visitan os nenos no hopital de Ourense

Despois dunha noite de moito traballo para repartir os agasallos polas casas, os Reis Magos aínda sacaron tempo para visitar os cativos e os maiores ingresados no hospital de Ourense. Coa axuda dos bombeiros da cidade subiron no guindastre do camión para achegarse saudar desde as fiestras. E algúns pequenos e pequenas puideron recibir os agasallos das propias mans das súas maxestades de Oriente.

Coa axuda dos bombeiros os Reis Magos chegaron esta mañá ao hospital de Ourense. Antes de emprender a longa viaxe de volta a Oriente, Melchor, Gaspar e Baltasar quixeron visitar as pequenas e os pequenos que están estes días ingresados. E repartiron agarimos e agasallos.

Alegría nun día máxico. Alira quería quedar soa para abrir o seu agasallo coa súa nai e entón si que sorriu de alegría. E Ariadna quedou moi contenta, pero... ela di que quería un camión de bombeiros e un coche de policía e recibiu unha boneca. Pero como estaban alí os bombeiros prometéronlle que cando se recuperase podería visitalos e montar nun camión de verdade. Ese si que foi un grande agasallo. 

E os acabados de nacer como Álvaro non se acordarán, pero tamén recibiron o seu primeiro agasallo de Reis. E o pequeno si que foi o mellor agasallo de Reis para a súa nai e o seu pai. 

E finalmente as súas maxestades subiron no guindastre do camión de bombeiros para levarlles ilusión e moita forza a todos os pacientes.