Os talibáns prohiben o son da voz das mulleres en público

O Goberno de facto de Afganistán ratificou unha lei para a Propagación da Virtude e a Prevención do Vicio que obriga ao uso do veo para cubrir o rostro de mulleres, e condena o son en público da voz da muller como unha falta contra a modestia, empregando a interpretación máis rigorosa da lei islámica.

A lei relativa ao Ministerio da Virtude e Vicio, foi ratificada onte á noite polo Emirato Islámico de Afganistán, como se denomina o réxime de facto dos talibáns, confirmaron este venres fontes oficiais dos talibáns.

A lei de 35 artigos contén catro capítulos que abordan cuestións como o veo integral ou hiyab para mulleres, a vestimenta dos homes, e regulacións dos medios de comunicación.

"De acordo con esta lei, o Ministerio está obrigado a ordenar o ben e prohibir o mal (...) e tamén é responsable da paz e a fraternidade entre a xente", indicou o portavoz do Ministerio de Xustiza, Barkatullah Rasooli, nunha declaración publicada hoxe pola canle afgá Tolo News.

Ademais, o temido Ministerio deberá "impedir á xente participar en prexuízos étnicos, lingüísticos e rexionais", agregou.

No artigo que se refire ao hiyab, a norma establece como necesario que as mulleres cubran o rostro e o corpo para evitar "causar tentación", e evitar o son en público da voz en alto de mulleres, incluíndo cantar, recitar, ou falar fronte a micrófonos.

Así mesmo prohibe aos condutores transportar mulleres adultas sen un titor masculino legal.

"A implementación da sharia e o hiyab é a nosa liña vermella. Non podemos negociar con ninguén sobre estes asuntos", dixo nunha reunión coas autoridades o ministro da Virtude e o Vicio, Mohammad Khalid Hanafi, segundo Tolo.

Para os homes, o artigo 22 prohibe ou condena o uso de gravata, afeitarse ou recortar a barba por baixo da lonxitude dun puño, ou peitearse, como violacións da lei islámica.

A norma ten tamén provisións xerais sobre os medios de comunicación e a súa obrigación de adaptarse á sharia, e a prohibición de "humillar ou insultar aos musulmáns", así como incluír imaxes de seres vivos.

De acordo cos talibán, a norma esta feita en concordancia coa sharia islámica e Hanafi, unha das catro principais escolas de xurisprudencia islámica sunnita.

Aínda que para algúns analistas, os talibáns non seguen unha escola xurídica específica, as súas interpretacións e aplicación da lei islámica baséanse en gran medida no Hanafi, o seu enfoque é máis estrito e fundamentalista.

Aínda que unha grande parte das prohibicións relacionadas a mulleres ou a vestimenta fóronse poñendo en funcionamento no país desde que os talibáns volveron ao poder tres anos atrás, esta lei supón a uniformidade e o rigor do castigo para impoñer o seu cumprimento.