Os veciños de Coruxo, fartos dos ataques do xabaril na parroquia

Os veciños de Coruxo, en Vigo, están fartos da presenza de xabarís na súa parroquia. Din que estes animais provocan a diario estragos nas súas leiras e que xa non compensa plantar. Preocúpalles tamén a súa seguridade, porque os xabarís achéganse en mandas ás súas casas e xa provocaron algún accidente de tráfico.

Case a diario atopan as pegadas e os estragos que deixan nas súas leiras. A maior parte deles deixaron de plantar, pois para eles xa non é rendible facelo.

"Hai que pechar as leiras, hai que gastar un monte de cartos para pechar con malla, perder tempo, pasta..., e ao final, se queren entrar, rebentan todo e entran", conta Inés Comesaña, unha das veciñas afectadas.

"Queremos botar o millo, pero vai ser imposible. As patacas non as come, pero levántaas, o viñedo levántacho todo tamén. Estamos preocupados porque non imos poder botar este ano nada", lamenta Lorenzo González, outro dos afectados.

Din que dende os incendios forestais de 2017 a presenza de xabarís é cada vez maior. Buscan comida a calquera hora do día e en zonas poboadas. Preocúpalles a súa seguridade, especialmente nas estradas, onde é habitual velos.

Os veciños demandan máis medidas e maior implicación das administracións para solucionar esta problemática.