Arnaldo Otegi acada o 94 % dos votos da militancia para seguir á fronte de EH Bildu
A coalición aposta por "priorizar" a formación de listas conxuntas con outros partidos para as eleccións xerais e ao PE
Otegi no III Congreso de EH Bildu en Pamplona. EFE/ Jesús Diges
Arnaldo Otegi foi elixido co 94,44 % dos votos da militancia de EH Bildu como secretario xeral da formación no seu III Congreso, no que se renovou a dirección con máis do 90 % dos apoios, para a que había unha única candidatura, e o ideario cun relatorio político.
Tras coñecerse a súa reelección, recibido aos berros de “independentzia” polos asistentes, Otegi comezou a súa intervención coa reflexión de que “só hai unha orde mundial xusta: o respecto á soberanía e dereito de determinación dos pobos, a distribución da riqueza e o reforzo da paz”.
Mostrou o seu “orgullo” polo camiño percorrido e a “fronte ampla que estamos a construír” tras un “debate coherente”, do que se deriva como piar a reivindicación de “antiliberalismo e soberanía nacional para o pobo vasco”.
Neste segundo concepto, sen citar expresamente a ausencia de maioría suficiente, foi práctico ao avogar por “elevar o campamento base do autogoberno o máis próximo posible á súa cima”, consciente de que EH Bildu “non está para articular minorías intensas senón maiorías democráticas populares”.
Antiliberalismo
En canto ao antiliberalismo, Otegi asegurou que “a diferenza fundamental” entre esquerdas e dereitas é a distancia entre “negocio ou dereitos fundamentais” xa que “onde uns vemos educación, sanidade ou servizos, as dereitas só ven espazos para os negocios”.
O renovado líder da esquerda abertzale, que superou o 88 % dos apoios conseguidos no anterior congreso, pediu que EH Bildu sexa “exemplo de como se entende o poder desde a soberanía popular” nun “Estado plurinacional no que existen nacións sen dereito á libre determinación”.
Junqueras e Kearney
O acto de clausura contou con senllas breves intervencións de apoio a cargo do presidente de Esquerra Republicana de Catalunya (ERC), Oriol Junqueras, e o representante do Sinn Fein, Declan Kearney, quen mostrou o seu apoio aos obxectivos independentistas de EH Bildu e á súa estratexia.
Ademais, no Congreso aprobáronse tres resolucións políticas, a máis destacable é a aposta por "priorizar" a formación de listas nacionais conxuntas con outros partidos para as eleccións ao Senado e Congreso e ao Parlamento Europeo, "sobre a base dun programa mínimo común de amplo consenso".
Reformou ademais o organigrama directivo da coalición, que comparten Sortu, Eusko Alkartasuna (EA) e Alternatiba, ao cambiar a denominación do cargo de Otegi desde coordinador xeral a secretario xeral.
