París prohibe os patinetes de alugueiro na cidade

O Concello de París considera "un éxito" a votación cidadá que apoiou prohibir os patinetes de alugueiro das rúas da capital francesa.

Na votación participaron algo máis de 103.000 persoas, menos dun 8 % do censo municipal.

Un 89 % dos votantes mostráronse a favor de non renovar os contratos que permiten a tres compañías operar 15.000 patinetes eléctricos de alugueiro nas rúas parisienses.

Moitos habitantes da capital reprochan que un bo número de usuarios utilizan os aparellos de forma perigosa e pouco cívica, mentres que outros valoran o seu lado práctico e útil.

O Concello esgrimiu tamén o forte aumento das sinistralidade.

As empresas operadoras pediran unha votación electrónica, confiando nunha maior participación dos mozos, os principais usuarios dos seus patinetes, pero o Concello non puido facelo por carecer dos equipos necesarios para garantir a seguridade informática dos datos do censo.

As tres empresas emitiron un comunicado conxunto no que lamentaron "as condicións asimétricas" desta "consulta inédita", para a que solicitaran, ademais do voto electrónico, máis centros de votación e máis información municipal.

Esta semana o concello contactará coas empresas operadoras para estudar as modalidades do final dos contratos, que expiran o 1 de setembro, e medidas sociais para os traballadores que perdan o seu traballo.