Ingresan en prisión catro dos cinco detidos polo alixo de droga comisado en Asturias
Os catro arrestados no Principado, tres franceses e un galego, ingresan en prisión provisional, comunicada e sen fianza
A Garda Civil aprehendeu 486 quilos de cocaína en bolsas de deporte ao afundirse unha narcolancha preto de Cudillero
O detido en Ribeira pasa a disposición xudicial
O home detido en Ribeira, pola súa suposta implicación no alixo de case 500 quilos de cocaína comisada en Asturias ao afundirse unha narcolancha, quedou en liberdade tras pasar a disposición xudicial este sábado no Barbanza, investigado por un delito de tráfico de drogas.
Os outros catro arrestados no Principado, os tres tripulantes da embarcación de nacionalidade francesa e outro galego, ingresaron en prisión provisional, comunicada e sen fianza, en base ao risco de fuga e á cantidade de droga aprehendida.
A Fiscalía, que considera os feitos "constitutivos dun delito contra a saúde pública", solicitara a medida cautelar por pertenza a organización criminal e tratarse dun delito de extraordinaria gravidade.
"Ademais, trátase dunha investigación en curso e, de quedaren os investigados en liberdade, poderían interferir na mesma e obstaculizar o bo fin da instrución. Doutra banda, no caso dos detidos estranxeiros, trátase de cidadáns que non teñen arraigamento e España, o cal incrementa o risco de subtracción da acción da Xustiza (fuga). Os investigados exerceron o seu dereito a non declarar", indicaban dende o Ministerio Fiscal.
Aviso por naufraxio
A Garda Civil e a Policía Nacional incautáronse este venres dun total de 486 quilos de cocaína tras recibir o aviso dun posible naufraxio a dez millas da costa de Cudillero.
Dentro da embarcación atopábanse tres tripulantes que foron rescatados por Salvamento Marítimo e trasladados ao hospital de Jove, en Xixón, ao presentar síntomas de hipotermia.
Ao regresar ao lugar do afundimento para verificar a situación da lancha e comprobar se supoñía ou non un perigo para a navegación, Salvamento Marítimo decatouse "da presenza de varios vultos aboiando próximos á embarcación".
"É aí cando ao examinar o contido dos paquetes de sete bolsas de deporte, deciden dar aviso á Garda Civil que se fixo cargo da droga", indican fontes xudiciais.
Recuperadas 11 bolsas
Efectivos do Servizo Marítimo Provincial e da Unidade Aérea da Garda Civil de Asturias trasladáronse ao lugar do incidente, onde procederon a recoller o resto dos vultos, así como a remolcar a embarcación ata o porto do Musel.
En total, localizaron 11 bolsas, das mesmas características que as recuperadas previamente. Cada unha destas bolsas contaba con 25 paquetes de algo máis dun quilogramo de peso.
O equipo de delincuencia organizada e antidroga (EDOA) da Garda Civil de Asturias comprobou que botaran unha embarcación desde a rampla do porto de San Esteban de Pravia a primeira hora da noite anterior, algo pouco habitual para estes traballos.
Tras localizar o propietario da embarcación e do remolque utilizado para o traslado ata o peirao, arrestaron esta persoa. Despois, grazas ao intercambio de información entre as forzas de seguridade, estableceuse a conexión do grupo cunha quinta persoa, detida en Ribeira.
