En Barbate lembran os dous gardas civís que morreron hai un ano arrasados por unha narcolancha
Representantes da Benemérita reclaman máis medios para loitar contra o narcotráfico no Estreito
Unha ofrenda floral no peirao de Barbate honraba este mediodía a memoria dos dous gardas civís que perderon a vida hai un ano, Miguel Ángel González e David Pérez Carracedo. Os familiares dos falecidos seguen a reclamar que os mandos da Benemérita dean a cara.
"Eu só pido que diga o que deu a orde: aquí estou eu, Como a min mo dixo no seu despacho. El díxomo a min que asumiría todas as responsabilidades da orde que deu", afirma Paqui Fernández, nai dun dos axentes falecidos.
En setembro do ano pasado foron detidos o piloto da narcolancha que os atacou, Karim El Bakali, de 32 anos, e dous acompañantes. Desde a Garda Civil piden xustiza e máis medios.
"Eles dérono todo, máis non se pode dar, máis da vida non se pode dar. Necesitamos materiais e medios para facer fronte como mínimo en igualdade de condicións que si teñen os delincuentes", sinala Juan Fernández, secretario xeral da Asociación Unificada da Garda Civil (AUSG).
Naquel 9 de febreiro do ano pasado, os mandos ordenaran que unha lancha pneumática con seis gardas civís a bordo fose identificar os tripulantes de varias narcolanchas que buscaban refuxio no porto de Barbate debido ao temporal.
O habitual é que os narcos opten por fuxir nesas circunstancias, pero neste caso lanzáronse contra a patrulleira con sete arremetidas en dous minutos e 47 segundos. Ademais dos dous falecidos, outros dous axentes resultaron feridos. Os sobreviventes dixeron despois que a operación fora improvisada polos mandos e suicida. Houbo un erro inicial na identificación dos atacantes e sete meses máis tarde foron detidos os verdadeiros culpables.
