Polo menos 60 libaneses mortos e 168 feridos por ataques israelís nas últimas 24 horas

Polo menos 60 persoas morreron no Líbano nas últimas 24 horas e outras 168 quedaron feridas por ataques israelís, informou o Goberno libanés este venres.

Segundo o coordinador do Comité de Emerxencia do Goberno, Nasser Yassin, citado pola Axencia Nacional Libanesa de noticias, o total de falecidos desde hai un ano, cando comezaron os enfrontamentos entre o Exército de Israel e o grupo xiíta Hezbollah elévase a 2.229 e o de feridos a 10.380, a inmensa maioría nas últimas semanas.

"Nas últimas 24 horas rexistráronse 57 ataques aéreos (israelís), o que eleva o número total de ataques desde o inicio da agresión a 9.588", asegurou Yassin.

Segundo o Ministerio de Saúde, ata a data, foron abertos 1.032 centros para acoller a persoas desprazadas, dos cales 837 alcanzaron a súa capacidade máxima.

Desde o estalido do conflito, nos centros de acollida rexistráronse 187.000 persoas que se viron forzadas a abandonar as súas casas polos ataques do Exército israelí.

Ademais, o Ministerio apuntou que entre o 23 de setembro e 11 de outubro de 2024, rexistrouse o cruzamento de 317.457 cidadáns sirios e 115.044 cidadáns libaneses cara a territorio sirio.

Israel e Hezbollah levaban encerellados nun fogo cruzado desde o 8 de outubro do ano pasado, un día despois do ataque do grupo palestino Hamas contra Israel que causou uns 1.200 mortos e 250 secuestrados.

O conflito agravouse o 1 de outubro coa irrupción terrestre do Exército israelí no sur do Líbano, acompañada dunha intensificación dos bombardeos israelís no país veciño.