Pontón propón aos empresarios establecer un instituto galego de crédito
Pontón propón aos empresarios establecer un instituto galego de crédito
Aposta por establecer un plan de fomento da actividade tecnolóxica e industrial, co obxectivo de elevar o peso da industria ao 25 % do PIB en 2030
Ana Pontón participou nunha xuntanza na Cámara de Comercio de Santiago de Compostela
A portavoz nacional do BNG, Ana Pontón, propuxo este martes nunha reunión con empresarios establecer un instituto galego de crédito para frear a marcha e o peche de empresas e impulsar novos proxectos.
"O noso aforro emigra mentres aquí as pemes teñen dificultades para recibir créditos en boas condicións e non é razoable que iso pase", dixo Pontón nunha reunión da Cámara de Comercio de Santiago de Compostela.
Pontón, acompañada da alcaldesa da capital galega, Goretti Sanmartín, e dos deputados autonómicos Iria Carreira e Daniel Pérez, insistiu en que Galicia non pode seguir relegada.
A líder do BNG observou que hai unha perda continuada de poboación, unha das xeracións mellor formadas na emigración, unha crise industrial perpetua, o peche de empresas ou a perda de galeguidade de grandes referencias industriais que están a ser absorbidas por capital foráneo.
Neste sentido, preconizou establecer un plan de fomento da actividade tecnolóxica e industrial, co obxectivo de elevar o peso da industria ao 25 % do PIB en 2030, desenvolvendo un tecido de pemes en sectores estratéxicos como a automoción, o naval, a robótica, o forestal, o químico-farmacéutico ou a agroindustria.
Avogou por un especial esforzo no ámbito rural, que ocupa o 90 % do territorio e concentra o 40 % da poboación, indicou.
