O BNG pide que a CRTVG sexa ben público e que o director sexa elixido por concurso

A viceportavoz do BNG no Parlamento, Olalla Rodil, presentou este venres a proposta lexislativa que propón a súa formación fronte á lei de medios públicos aprobada pola Xunta, coa que propoñen regular a Corporación Radio Televisión de Galicia (CRTVG) e que o director da compañía sexa elixido mediante un concurso público que sexa avaliado por un comité de expertos.

A deputada nacionalista avanzou que o seu grupo presentará unha emenda á totalidade á norma que previsiblemente se debaterá neste período de sesións no Parlamento e que ademais rexistrarán un texto alternativo, xa que os nacionalistas opóñense “totalmente” á lexislación elaborada polo Executivo galego.

Segundo Rodil, a norma “incrementa o control político e partidista” sobre os medios públicos ao abrir a porta a rebaixar o apoio parlamentario necesario para elixir o director xeral da CRTVG, que poderá ser designado coa maioría absoluta coa que conta PP na Cámara autonómica en terceira votación se antes non se alcanzan os apoios para unha maioría reforzada.

Ademais, denunciou, o texto contempla que “por primeira vez desde a súa creación se abra a porta a unha lingua diferente do galego”.

Proposta alternativa do BNG

Fronte a todo iso, o Bloque rexistrará unha proposta para “rescatar” os medios públicos e “devolverllos á cidadanía” O BNG propón regular a CRTVG como “ben público” dado que é un “patrimonio de todos os galegos” e require de “defensa e promoción”, aínda que tamén se debe adaptar aos tempos e aos cambios tecnolóxicos.

Na norma, os nacionalistas tamén avogan por manter o actual nome da corporación, a diferenza do texto proposto pola Xunta que prevé cambiar a denominación ao de Corporación de Servizos Audiovisuais de Galicia.

Así mesmo, insisten na necesidade de designar á dirección mediante un concurso “público, aberto e transparente” que elixa os seus membros atendendo a “criterios obxectivos”. Para iso, avogan porque os membros da dirección sexan acordados por un comité de expertos e que esta elección se leve a cabo en base a “proxectos” e non “a afinidades políticas".

Na mesma liña recóllese a obrigatoriedade de crear un consello de informativos que debe estar en funcionamento nun prazo de seis meses desde que a norma entre en vigor. O obxectivo, dixo Rodil, é frear a situación de “manipulación” que actualmente atravesa a CRTVG e que chega a “límites insospeitados”, sostivo.

Finalmente, os nacionalistas consideran que a lexislación debe blindar o idioma galego como lingua propia da corporación e reforzar o “papel normalizador” con contidos en galego para o público infantil e xuvenil.