Primeira muller curada de VIH grazas a células nai do cordón umbilical

Unha neoiorquina é a primeira muller posiblemente curada de VIH grazas a un transplante de células nai de cordón umbilical resistentes a ese virus, que se combinaron con outras dun parente próximo para aumentar as posibilidades de éxito.

A denominada paciente de Nova York padecía ademais un tipo de leucemia, o que facía necesario un transplante de medula, e leva sen virus desde 2017.

Este caso deuse a coñecer hai un ano nun congreso médico, pero ata o de agora non se publicaron os resultados en ningunha revista científica, cousa que fai hoxe en Cell o equipo, encabezado pola Universidade de California (UCLA) e a Johns Hopkins.

A día de hoxe catro persoas considéranse curadas do VIH, os pacientes de Berlín, Londres, Düsseldorf e agora Nova York.

Todos padecían ademais unha leucemia que requiría dun transplante de medula, unha intervención arriscada que só está indicada en cancros hematolóxicos.

Un tratamento que permite curas en pacientes de todas as orixes raciais.

O caso da paciente de Nova York, unha muller de mediana idade que se identifica como “racialmente mixta”, ten varias peculiaridades fronte aos outros.

É a primeira que se someteu a un transplante de células nai resistentes ao VIH procedentes de sangue de cordón umbilical e non dun doante adulto compatible.

O equipo considera que o uso de células nais de sangue de cordón umbilical aumenta a posibilidade de curar o VIH en persoas de todas as orixes raciais”.

"A epidemia de VIH é racialmente diversa, e é extremadamente raro que as persoas de cor ou de raza diversa atopen un doante adulto non emparentado suficientemente compatible", explicou Yvonne Bryson, da UCLA e codirectora do estudo.

"Co sangue do cordón umbilical non se dispón de tantas células e tardan un pouco máis en poboar o organismo tras a súa infusión", pero usar unha mestura de células nai dun parente e de sangue de cordón umbilical “dá un empuxón ás células de sangue de cordón umbilical", indicou Bryson.

O transplante conseguiu poñer en remisión tanto o VIH como a leucemia

Trinta e sete meses despois do transplante, a paciente puido deixar de tomar a medicación antivírica contra o VIH.

Os médicos que fan o seu seguimento afirman que leva máis de 30 meses sen contraer o VIH desde que deixou o tratamento antivírico.

Con todo, debido ao invasivo do procedemento, os transplantes de células nai (tanto coa mutación como sen ela) só se consideran para persoas que necesitan un transplante por outras razóns, e non para curar de forma illada o VIH, enfermidade para a que existe medicación.