Quebra Tupperware, a icónica firma de envases de almacenamento

A multinacional estadounidense de produtos para o fogar Tupperware iniciou o proceso para declararse en quebra arrastrada pola caída das vendas e buscará a aprobación dos tribunais para continuar operando e facilitar un proceso de venda para protexer a súa marca.

Tupperware Brands, coñecida mundialmente polos seus envases de plástico para o almacenamento de alimentos, iniciou voluntariamente o procedemento acolléndose ao capítulo 11 no Tribunal de Quebras dos Estados Unidos de Delaware, o que afundiu a acción máis dun 50 % na bolsa de Nova York e provocou a súa posterior suspensión.

Segundo subliñou a directora executiva da compañía, Laurie Ann Goldman, a medios estadounidenses, nos últimos anos a posición financeira viuse gravemente afectada pola desafiante contorna macroeconómica.

A maior competencia e a caída da demanda dos seus produtos debilitaron durante os últimos anos o negocio dunha firma que arrastraba problemas de liquidez.

Tupperware foi fundada en Massachusetts en 1946 polo químico Earl Tupper, que deseñou os emblemáticos recipientes herméticos de plástico para axudar ás familias para conservar os seus alimentos durante a posguerra.

A icónica marca fíxose coñecida tamén polas súas vendas a domicilio, que chegaron a bautizarse como as "festas Tupperware".

A compañía xa atrasara en marzo deste ano a presentación das contas anuais de 2023, e en xuño anunciou os seus plans para o peche da súa única fábrica nos Estados Unidos e o despedimento de case 150 empregados.

Desde 2020 a empresa de artigos de cociña, que liderou durante décadas o negocio de almacenamento de alimentos, presentara problemas que facían dubidar das súas posibilidades de perdurar.

O ano pasado Tupperware, cuxas accións caeron cerca do 75 %, levou a cabo unha reorganización do seu equipo directivo e nomeou CEO a Laurie Ann Goldman en substitución de Miguel Fernández.

Segundo apuntan varios medios, Tupperware presenta activos de entre 500 millóns e 1.000 millóns de dólares e pasivos de 1.000 a 10.000 millóns de dólares. Así mesmo, conta con máis de 700 millóns de dólares en préstamos.

A empresa buscará a aprobación do tribunal para facilitar un proceso de venda do negocio e continuar operando durante procedementos de quebra.

A declaración de quebra en Delaware prodúcese tras meses de trámite.

Unha década despois de iniciar a súa actividade nos Estados Unidos, Tupperware expandiuse a Europa e a mediados dos anos 60 xa tiña presenza en seis países europeos, e logo deu o salto ao mercado latinoamericano e ao asiático.