Quique chega ao Obradoiro tras peregrinar por un futuro sen sarcoma

Quique Nogueroles é un rapaz de 14 anos de Alacant que está a loitar contra un sarcoma e que chegaba este domingo á praza do Obradoiro tras rematar o Camiño de Santiago. A súa é unha historia de superación.

Durante cinco días de andaina estivo acompañado por un grupo de 50 persoas, entre familiares, amigos e membros da Fundación CRIS contra o cancro e a Fundación Iñaki Nogueroles Jóvenes contra el Cáncer.

"Foi unha experiencia moi chula, estiven acompañado de moita xente e moi divertida".

"Véxome como un símbolo de superación, porque eu que hai dous meses estaba nunha cama con quimioterapia agora estou aquí camiñando 20 quilómetros ao día".

"Hoxe Quique é a voz doutros moitos nenos e nenas que precisan dun tratamento personalizado para seguir avanzando e só o imos acadar concienciando a sociedade da necesidade de investir en investigación para conseguilo".

"A experiencia foi impresionante, o Camiño, como a vida mesma, é un camiño de superación, de momentos difíciles, de compañeirismo".

"Tiven 132 sesións de quimioterapia e 60 de radioterapia, agora estou a gozar do verán e cando volva a Alacant xa verei o que fago".

"É unha lección de esperanza para moitos mozos e adolescentes na súa situación e un exemplo para todos no camiño de superación, porque foi á cabeza en todo momento do grupo. Para todos foi unha lección de forza e de esperanza desde logo".

Á súa chegada ao Obradoiro foi recibido polo conselleiro de Sanidade, Antonio Gómez Caamaño. Entre os obxectivos desta andaina están visibilizar a necesidade de investir en investigación contra o cancro e recadar uns cen mil euros para a investigación do cancro infantil. As doazóns poden facerse a través de https://elsellodequique.ganaralcancer.com/