O viaduto do Castro na A-6 reabre ao tráfico este luns en sentido A Coruña
O viaduto do Castro na A-6 reabre ao tráfico este luns en sentido A Coruña
O ministro de Transportes, Óscar Puente, inaugura a reconstrución da infraestrutura que colapsara no 2022
O segundo viaduto do Castro na A-6, entre Galicia e León, reabre de novo ao tráfico este luns logo da reconstrución deste treito, que colapsou no mes de xuño de 2022, cando realizaban traballos de mellora.
O ministro de Transportes preside ás 11:00 horas en Vega de Valcarce o acto da posta en servizo da nova estrutura en sentido A Coruña e a apertura do segundo carril da calzada en sentido Madrid.
Óscar Puente asegura que a falta de resistencia do formigón, a degradación dos materiais e a pésima drenaxe da auga con sales fundentes, que afectou ás xuntas de dilatación, contribuíron ao seu derrubamento.
No tempo que duraron as obras, o tráfico desviouse por Pedrafita do Cebreiro. Hai un ano, recuperouse a circulación en sentido Madrid polo viaduto e, agora, abre o carril de entrada a Galicia.
Deste xeito, remata un episodio sen precedentes na historia das infraestruturas españolas que tivo repercusións sociais, económicas e loxísticas.
O Ministerio de Transportes e Mobilidade salienta nun comunicado que "se recupera a normalidade" no traxecto de autovía que une dita localidade leonesa coa lucense de Pedrafita do Cebreiro, no límite das comunidades autónomas de Castela e León e Galicia.
