Entran en vigor os orzamentos da Xunta, con máis de 10.000 milllones de gasto social
Entran en vigor os orzamentos da Xunta, con máis de 10.000 milllones de gasto social
O Goberno galego salienta que as contas apostan pola vivenda, cun orzamento de 221 millóns de euros
O conselleiro de Facenda, Miguel Cargos
Este mércores entraron en vigor os orzamentos da comunidade autónoma de Galicia para este ano 2025 que ascenden a 13.954 millóns de euros. Os recursos orzamentarios recollen, sinala o Executivo, "o reforzo continuo e permanente do gasto social, a sanidade, a educación, as políticas sociais e o emprego".
"Para iso destínase unha cifra que supera por primeira vez os 10.000 millóns de euros ata alcanzar os 10.227 millóns, isto quere dicir que un 74 % do orzamento, tres de cada catro euros, destínanse ao coidado das persoas a través da sanidade, a educación, a política social e o emprego".
O Goberno galego insiste en que as contas apostan pola vivenda, cun orzamento de 221 millóns de euros. "E consolidan o modelo tributario galego que se caracteriza pola autonomía fiscal, a responsabilidade, que fai compatible a rebaixa da presión fiscal co reforzo dos servizos públicos, e que é sostible, xa que consolida as medidas no tempo, en función da conxuntura económica".
O Executivo galego afirma que os colectivos prioritarios para aplicar estes beneficios son as rendas medias e baixas, os menores de 36 anos, as familias numerosas e os colectivos vulnerables, "á vez que se favorece aos sectores estratéxicos da economía", apostila.
