Rueda apraza a viaxe ao Brasil para poder reunirse con Sánchez o vindeiro venres

O titular do executivo galego, Alfonso Rueda, aprazou a súa viaxe institucional ao Brasil para poder reunirse o vindeiro venres co presidente do Goberno, Pedro Sánchez, co que non tivo un encontro bilateral desde as eleccións autonómicas de febreiro.

Fontes da Xunta explican que o venres pasado o equipo da Presidencia do Goberno contactou para propoñer a reunión este venres día 20 de setembro.

Naquela data, engaden, "xa era público" que ese día "comezaba a viaxe institucional do presidente da Xunta ao Brasil, no que había fixadas varias reunións coa colectividade galega, gobernadores e empresarios".

"A pesar de todo, a audiencia na Moncloa é absolutamente prioritaria para a Xunta e, por iso, ao longo da fin de semana fixéronse as xestións necesarias para aprazar a viaxe e poder acudir á reunión na data proposta polo Goberno central. Así se lle comunicou ao equipo do presidente do Goberno nesta fin de semana", agregan.

A Xunta agarda que se respecte a orde estatutaria na rolda de xuntanzas, "tal e como anunciou hai dous días o propio Goberno", e que Alfonso Rueda "se converta o venres 20 no terceiro mandatario autonómico en ser recibido por Pedro Sánchez".

Ademais, indican que o titular do executivo galego "levará unha lista de cuestións absolutamente prioritarias para Galicia ás que se debe dar resposta canto antes".