Rueda asina un convenio de colaboración con empresarios galegos no Brasil para fomentar as relacións comerciais

O presidente da Xunta asinou un convenio de colaboración coa Associaçao Brasileira de Empresarios Galegos (Abegal), no Río de Xaneiro, para fomentar as relacións comerciais, profesionais e de investimento, así como apoiar a captación de novos asociados para a entidade, de forma que se fortaleza a súa presenza no mercado brasileiro.

Rueda, no nome do Instituto Galego de Promoción Económica (Igape), e o presidente de Abegal, José Manuel Caamaño, selaron este acordo, aprobado esta mesma semana no Consello da Xunta.

"A contribución de Abegal é clave para consolidar a marca Galicia, representando a calidade e o saber facer que nos define tanto en Galicia como no exterior", afirma Rueda.

Durante a súa intervención, destacou tamén o potencial exportador da comunidade galega nos sectores agroalimentario e vitivinícola.

Tamén lembrou que a estratexia Galicia Retorna busca facilitar o regreso de 30.000 galegos do exterior entre 2023 e 2026.

Remarca as oportunidades que ofrece Galicia para os empresarios brasileiros en sectores como biotecnoloxía, as TIC e as enerxías renovables. Durante a súa xira polo Brasil, o presidente da Xunta tamén visitará este venres a emblemática Casa de Espanha no Río de Xaneiro, unha institución que representa un nexo entre pobos irmáns. Alí, fará entrega de senllas placas conmemorativas tanto á Casa de Espanha como á Asociación Recreo dos Anciáns do Río de Xaneiro.