Besteiro defende a postura do Goberno sobre a competencia do litoral e Rueda fala de "incoherencia dos socialistas"

A primeira reunión entre o presidente da Xunta, Alfonso Rueda, e o novo delegado do Goberno en Galicia, José Ramón Gómez Besteiro, evidenciou, segundo eles, “boa sintonía” e "excelente ton” entre ambos, pero puxo sobre a mesa discrepancias respecto á repartición de fondos europeos e avances en infraestruturas. Así o manifestaron estes dous dirixentes, en comparecencias por separado, tras un encontro que se celebrou nas dependencias da Xunta en San Caetano e que durou apenas unha hora.

Besteiro, volveu a defender a postura do Goberno sobre a competencia da xestión do litoral. Insistiu na vía da modificación do Estatuto. Evitou pronunciarse sobre o apoio do PSdeG á tramitación da lei autonómica do litoral remitida pola Xunta ao Parlamento.

 Alfonso Rueda lembrou que na Xunta seguen á espera de que o Ministerio para a Transición Ecolóxica maniféstese sobre o informe do Consello Consultivo que di que a Comunidade Autónoma de Galicia xa conta con "todas as facultades ou funcións" de ordenación do litoral sen necesidade de modificar o Estatuto.

O presidente da Xunta  pediulle ao Goberno “coherencia coa postura do PSOE en Galicia” porque aínda que “unha cousa é o Goberno e outra o partido”, esixe unha “incoherencia clarísima”.

Respecto a fondos europeos, Gómez Besteiro puxo o foco no “toque de atención” dado polo Consello de Contas de Galicia á Xunta a través dun informe de fiscalización sobre as medidas para implantar o Plan de Recuperación, Transformación e Resiliencia  pois o organismo pide un maior seguimento aos plans e proxectos aprobados.

O delegado do Goberno esixiu “axilidade” debido a que o Executivo permite ás comunidades “xestionar a metade dos fondos conseguidos por Pedro Sánchez”.  O obxectivo é que “non se perda nin un só euro” polo que “tamén é necesario que a Xunta concrete a achega de fondos propios” do mesmo xeito que fan outras comunidades.

Sobre os fondos europeos, Alfonso Rueda asegurou que á Xunta "non lle vale" o discurso de que os grandes proxectos estruturais pedidos polo Goberno central teñen que esperar a Pertes que se van a convocar "dentro dos Pertes industriais, que nunca chegan e que cada vez están a desesperar e desesperando máis aos grandes investidores que queren facer proxectos potentes en Galicia".
"Preguntoume ademais o delegado do Goberno por canto estaría disposto a poñer a Xunta e xa lle dixen que os investidores que están a esperar os fondos Next Generation saben perfectamente o compromiso da Xunta e das cantidades que nos pediron", dixo Rueda, que insistiu en que o Executivo autonómico está "absolutamente disposto a achegar a súa parte".

Rematou o presidente da Xunta engadindo que "o que non se pode pretender loxicamente é que quen se reserva o 100% dos Next Generation, agora diga que non os vai a mover ou que os vai a mover en función do que fagan outras administracións".