Rueda pon o novo centro integral de saúde de Lalín como exemplo "dunha sanidade máis próxima"
Rueda pon o novo centro integral de saúde de Lalín como exemplo "dunha sanidade máis próxima"
A Xunta de Galicia investiu nel máis de 13 millóns e medio de euros
Vai evitar desprazamentos a máis de 35.000 veciños da comarca do Deza
Lalín e a comarca do Deza terán un novo centro integral da saúde a vindeira semana. O presidente da Xunta participou este xoves na inauguración das instalacións, que puxo como exemplo "dunha sanidade máis próxima".
O centro ofrecerá servizos como cardioloxía, rehabilitación cardíaca e cirurxía ambulatoria. Alfonso Rueda destacou que vai evitar desprazamentos a máis de 35.000 veciños da comarca do Deza.
Durante a súa intervención no acto, Rueda incidiu en que se trata dun edificio "moderno, amplo, accesible e ben equipado" que, ademais, reflicte "o esforzo" da Xunta "por mellorar a calidade de vida de todos os galegos independentemente do lugar en que vivan".
"Este é o segundo centro integrado que vai funcionar. O primeiro está en Lugo, outro en construción avanzada en Vigo, doutro acabamos de aprobar os trámites para facelo en Ourense. Polo tanto Lalín é o segundo de Galicia despois dunha capital de provincia", engadiu.
As novas instalacións permitirán unificar nun mesmo edificio o centro de saúde, o punto de atención continuada e os servizos de emerxencias do 061.
O centro comezará a funcionar o próximo luns. A Xunta investiu nel máis de 13 millóns e medio de euros.
