Rusia cerca Kíiv con bombardeos nas zonas residenciais da capital
Rusia cerca Kíiv con bombardeos nas zonas residenciais da capital
Nove mortos no ataque a unha torre de televisión ao norte de Ucraína
Sae a primeira poboación civil de Mariupol tras dúas semanas de asedio á cidade
O exército ruso non logrou aínda entrar en Kíiv despois de 19 días de invasión pero cerca xa a periferia da capital. Este barrio residencial, a escasos oito quilómetros do centro, quedou convertido en cascallos tras un bombardeo de madrugada. A maioría da poboación xa fora evacuada, pero aínda así hai ducias de feridos e polo menos dous falecidos.
Kíiv semella ser o próximo obxectivo das forzas de Putin, que continúan atacando poboación civil por toda Ucraína. Na segunda cidade do país, en Khárkiv, bombardearon nas últimas horas esta gardería. Segundo a Organización Mundial da Saúde, desde o inicio da invasión van 31 ataques a centros sociosanitarios.
As vítimas da guerra medran cada día. As autoridades ucraínas din que tan só en Mariupol van máis de 2.500 falecidos civís. Rusia non permite a entrada de axuda humanitaria e ata agora fracasaran todos os intentos de evacuar a cidade, da que este luns lograron saír uns 160 vehículos particulares con civís fuxindo das bombas e da fame.
Rusia intensifica a ofensiva polo norte
Tras atacar onte a zona oeste de Ucraína, case na fronteira con Polonia, hoxe Rusia intensificou a ofensiva polo norte, polo sur e polo leste do país.
Na rexión norteña de Rivne bombardeou unha torre de televisión. No sueste houbo ataques sobre Donetsk, Mikolaiv ou Zaporijia, onde bombardeou unha base militar moi próxima á central nuclear máis grande de Europa.
As tropas de Putin non chegaron aínda a Odesa, a xoia do mar Negro e o principal porto comercial de Ucraína. A poboación segue protexendo os principais obxectivos con sacos de area.
Nunha mensaxe na rúa, o presidente Zelenski chama os ucraínos a resistiren e afirma que as tropas de Putin están cada vez máis debilitadas.
As delegacións dos dous países retomarán este martes a cuarta rolda de negociacións. Nun clima, aseguran, de maior entendemento e en busca dun cara a cara entre Putin e Zelenski.
Negociacións entre Rusia e Ucraína
A delegación ucraína nas negociacións con Rusia informou de que as conversacións sobre a guerra e un posible armisticio foron suspendidas por hoxe, pero co compromiso de renovalas mañá martes.
"Nas negociacións tomamos unha pausa técnica ata mañá para un traballo adicional nos subgrupos e para definir determinadas definicións. As negociacións continúan", asegurou Mikhail Podoliak, asesor da oficina do presidente de Ucraína Volodimir Zelenski.
Os negociadores reuníronse este luns a través de videoconferencia. Na véspera transcendera que os equipos de negociación comezaran a alcanzar certos puntos de contacto nas conversas para alcanzar un cesamento do fogo, pero que iso non supuña que os combates se fosen deter de forma inminente.
