Rusia e Ucraína intensifican a actividade militar antes da asemblea xeral da ONU

Segundo as autoridades ucraínas, no soto dunha localidade de Khárkiv funcionou unha prisión e lugar de tortura mentres a zona estivo baixo control ruso. O presidente de Ucraína afirma que na rexión había, polo menos, outros nove centros coma este.

"As tropas rusas mantiveron os nosos veciños neste lugar; primeiro traballaban psicoloxicamente a xente na estación do tren, destruíndo a súa vontade. Logo os soldados rusos traíanos aquí, onde os obrigaban a dicir o que eles querían escoitar. Mantiveron aquí a xente sen comida e sen supervisión médica", sinalou Vyacheslav Zadorenko, alcalde do distrito de Derhachi.

Seguen sacando cadáveres

A poucos quilómetros, os especialistas ucraínos seguen desenterrando cadáveres das 440 foxas descubertas en Izium tras a saída das tropas rusas. O presidente ucraíno asegura que moitos cadáveres teñen sinais claros de tortura ou de execución.

Nos próximos días chegará á zona un equipo forense das Nacións Unidas, para investigar as causas e os porqués das mortes.

Regreso á casa en Khárkiv 

Mentres, a retirada rusa de Khárkiv permítelles aos máis atrevidos volver á súa terra.

"O primeiro é o primeiro, volvemos á nosa casa, ver como está primeiro e como reparala despois. Agora só quero que esta porcallada rusa sexa expulsada da nosa terra", afirma Nataliia Yelistratova, veciña de Balakliia.

Asemblea xeral da ONU

Os dous bandos, rusos e ucraínos, intensifican a súa actividade militar, sobre todo en Khersón e no Donbás, entre acusacións mutuas de terrorismo e de crimes de guerra.

Ucraína denunciou este domingo un ataque ruso a un hospital psiquiátrico, no que morreron polo menos catro médicos.

Ambas as dúas partes queren chegar nas mellores condicións posibles á asemblea xeral da ONU, que comezará o próximo martes e na que será clave a postura sobre a guerra da China e da India.