Sánchez nega que a súa muller fixese algunha xestión a favor do rescate de Air Europa
A preguntas dos xornalistas durante a súa comparecencia na China, contestou con rotundidade: "Non, en absoluto"
Un informe da UCO enviado ao xuíz do Tribunal Supremo sinala que o presunto conseguidor da trama lle dixo a Koldo García que o CEO de Air Europa falou con Begoña Gómez coa intención de que o rescate cristalizase
O presidente do Goberno Pedro Sánchez negou de plano que a súa muller Begoña Gómez realizase algunha xestión a favor do rescate da aeroliña Air Europa durante a pandemia de coronavirus: "Non, en absoluto", sinalou nunha comparecencia de prensa desde Pequín, onde está de viaxe oficial, ao ser interrogado sobre o recente informe da Unidade Central Operativa (UCO) da Garda Civil no que se fai referencia á súa muller.
Este atestado, enviado ao xuíz do Tribunal Supremo que investiga o chamado caso Koldo, recolle que o presunto conseguidor da trama, Víctor de Aldama, lle dixo ao exasesor ministerial Koldo García que o CEO de Air Europa Javier Hidalgo acababa de falar con Begoña Gómez tratando de que o rescate cristalizase.
Aldama trasladoulle a García que Hidalgo estaba "moi fodido" porque o rescate á súa empresa non terminaba de pecharse e estaba a tentar buscar alternativas.
"Está moi fodido o tema este, está a buscar a vida e acaba de chamar a Begoña", escribiulle nunha mensaxe o 3 de setembro de 2020, á que García respondeu: "Que chame a Pedro ou a quen faga falta".
Ao ser interrogado respecto diso, o xefe do Executivo dixo que xa respondeu en moitas ocasións sobre este asunto. "Non en absoluto", resolveu.
.png)
