Sánchez pídelle a Macron que cumpra o prazo do corredor ferroviario atlántico
Sánchez pídelle a Macron que cumpra o prazo do corredor ferroviario atlántico
O presidente do Goberno así o comunicou na comparecencia do Congreso ao deputado do PNV Aitor Esteban, quen o instara a aclarar con Francia cando estará lista esta conexión
![](https://img-g24-crtvg.flumotion.com/prog24/2023/20230419/corredoratlantico2.jpg)
O presidente do Goberno Pedro Sánchez confirmou este mércores que fixo chegar ao presidente francés Emmanuel Macron a petición para que o país veciño cumpra co acordado no Cumio de Barcelona para que a conexión ferroviaria transfronteiriza do corredor atlántico estea finalizada en 2030.
Sánchez contestou así na súa comparecencia no Congreso ao deputado do PNV Aitor Esteban, quen o instara a aclarar con Francia cando estará lista esta conexión.
"Eu estou cos presidentes autonómicos e pode contar co apoio do Goberno de España, tal e como o estamos facendo desde o primeiro momento", subliñou Sánchez, quen explicou que así llo fixo saber ao presidente Macron e á Comisión Europea.
Se botamos unha ollada atrás, o Ministerio de Transportes español asegurara que había un compromiso de Francia para rematar a conexión do corredor atlántico e mediterráneo en 2030.
Posteriormente, segundo advertira o deputado do PNV o pasado mes de febreiro, publicárase un informe francés que atrasaba a conexión ata 2042.
A ministra de Transportes Raquel Sánchez lembrou no pleno do Congreso que ambos os corredores contan no orzamento de 2023 cun investimento case idéntico e volveu insistir en que o Goberno está "absolutamente comprometido" coa súa execución.