Sargadelos reincorpora só o persoal que aceptou vacacións; a Xunta agarda que todos o fagan canto antes

A dirección de Sargadelos chamou os empregados que aceptaron adiantar unha semana de vacacións no medio do pulso que o dono, Segismundo García, mantén á Inspección de Traballo. Estes traballadores foron os únicos que se reincorporaron á fábrica este martes, aínda sen actividade, posto que a maior parte do persoal de produción, ao redor de medio cento, seguiu ás portas da factoría.

Así o sinalan distintas fontes consultadas por Europa Press, nunha xornada en que representantes sindicais que asesoran aos empregados -sen comité de empresa- denunciaron que "segue o esperpento", debido a que a última hora do luns o propio Segismundo García confirmou que chegara a un acordo coa Xunta -co conselleiro de Emprego, José González- para que a planta volvese á actividade.

A Xunta de Galicia lembrou o compromiso da dirección de Sargadelos de reiniciar a actividade produtiva no prazo máis breve posible e asegurou que espera que "así sexa" e que "todas as persoas traballadoras" se incorporen aos seus postos "canto antes".

Así o sinalou a Consellería de Emprego, Comercio e Emigración este martes. O departamento que dirixe José González indicou que, dentro da liña de colaboración disposta pola Xunta para volver á actividade con todas as garantías, segue en contacto "permanente" con Sargadelos para que cumpra "canto antes" o acordado, tendo en conta que as deficiencias detectadas na inspección realizada son emendables e permiten garantir a seguridade e saúde dos traballadores sen implicar o peche da planta de Cervo.

"Nin unha soa comunicación"

O secretario comarcal da CIG na Mariña, Xorxe Caldeiro, denunciou que non houbo por parte da firma “nin unha soa comunicación” aos empregados que declinaron acollerse á proposta que lles fixo a empresa: “Ou coller vacacións esta semana ou entrar a traballar baixo a súa responsabilidade”.

Só entraron na fábrica, dixo o portavoz sindical, aqueles traballadores que aceptaron algunha das propostas que o empresario lles puxo encima da mesa, “uns vinte”, máis ou menos, precisou, dun persoal que se achega ao centenar de persoas.

Segundo Caldeiro, a “sorpresa” saltou a media mañá. Xa entraran aqueles traballadores que decidiron reincorporarse aos seus postos “baixo a súa responsabilidade”, explicou, pero nese momento empezaron a chegar tamén “aqueloutros que supostamente colleran vacacións”, seguindo as indicacións da empresa.

Desde o pasado xoves, a emblemática fábrica de Sargadelos en Cervo (Lugo) ten a produción parada, despois de que Inspección de Traballo abrise un expediente e pedise ao empresario emendar ata 36 deficiencias detectadas nunhas instalacións onde dúas traballadoras desenvolveron silicoses.

O representante de CC.OO. no ámbito da industria na comarca da Mariña, José Antonio Zan, considerou que "alguén se está rindo" da Xunta e do conselleiro de Emprego. 

Zan tamén se referiu á ministra de Traballo, Yolanda Díaz, e instou tanto ao Goberno galego como ao central para actuar ante o que está a suceder en Cervo. De maneira contraria, recomendoulles "dimitir", tendo en conta que hai decenas de traballadores aos que non se deixa entrar ao seu posto de traballo no medio dun "esperpento".

"Pouco de voluntariedade"

O pasado venres, o propietario da compañía chamou a traballadores de tres en tres e deulles dúas opcións: ou ben asinar un documento segundo o cal aceptaban entrar á fábrica baixo a súa responsabilidade ou ben aceptar esta semana como período vacacional -algo, isto último, que en paralelo notificou á Inspección de Traballo-.

Unha decena aceptou a primeira alternativa e arredor doutros 10 empregados rubricaron a segunda proposta, que, segundo censuran os sindicatos, "ten pouco de voluntariedade". Así, case 50 traballadores permanecen desde hai catro xornadas laborais ás portas da fábrica remarcando que "o único" que queren é "traballar".

Algunhas fontes consultadas por Europa Press botan a vista atrás para comentar o "temor" que reina entre o persoal, por decisións que no seu día tomou o empresario como a de despedir á naquel entón presidenta do comité, Rogelia Mariña, de UXT. Previamente, foi revogada polos seus propios compañeiros no medio dunha serie de despedimentos.