Seis detidos na desarticulación dun punto de venda de droga no barrio vigués de Teis

Seis persoas foron detidas este mércores nun operativo da Policía Nacional para desarticular un punto negro de venda de drogas nun piso do barrio vigués de Teis.

O rexistro comezou sobre as 10:00 horas deste mércores, no número 47 da Avenida de Buenos Aires. Nel, interviñéronse cocaína, heroína e haxix, ademais de cartos en efectivo. Así mesmo, neste operativo foron detidas tres mulleres e tres homes novos, de etnia xitana, e con vínculos familiares.

A investigación apunta a que estas persoas, que residían como ocupas nesta vivenda, dedicábanse á venda de estupefacientes no domicilio, onde tamén convivían tres menores e un can.

Os veciños asistiron aliviados á actuación policial e varios deles recoñeceron que "a convivencia non era fácil" cos investigados, xa que había unha "constante trasfega" de persoas que acudían a comprar droga á vivenda. "Era acotío, pola mañá, pola tarde e de madrugada, timbrando aos interfonos, con berros e problemas", relatou unha das veciñas.

Segundo indicou, levan polo menos un ano padecendo estes problemas e mesmo, no seu caso, sufriu ameazas por parte dun dos clientes dos seus veciños. Ademais, sinalou que chamaron en varias ocasións á Policía, unha delas pola presenza dunha moza "tirada na escaleira, que non se sabía se estaba viva ou morta".

A vivenda rexistrada foi alugada no seu momento a unha parella pero os veciños explicaron que os inquilinos marcharon e deixáronlle a chave aos investigados, que ocuparon a vivenda. Respecto diso, confirmaron que o propietario iniciou os trámites para desaloxalos, e que se atopa pendente de que se execute a sentenza de desafiuzamento.